نئی دہلی،10؍ ستمبر (ایس او نیوز؍آئی این ایس انڈیا) انفورسمنٹ ڈائریکٹوریٹ (ای ڈی) نے ایئر سیل۔میکسس ڈیل معاملے میں سابق وزیر خزانہ پی چدمبرم کے بیٹے کارتی چدمبرم کو ملی گرفتاری پر روک کے خلاف دہلی کی پٹیالہ ہاؤس کورٹ میں عرضی دائر کی ہے۔ پٹیالہ ہاؤس کورٹ اس درخواست پر آج 2 بجے سماعت کی۔ا ی ڈی نے اپنی درخواست میں کہا تھا کہ سمن بھیجنے کے باوجود کارتی چدمبرم جانچ میں تعاون نہیں کررہے ہیں۔ گذشتہ 7اگست کو عدالت نے اس معاملہ میں پی چدمبر اور ان کے بیٹے کارتی چدمبرم کی گرفتاری پر لگی عبوری روک 8اکتوبر تک بڑھا دی تھی۔ ای ڈی کی عرضی پر سماعت کرتے ہوئے سی بی آئی کے خصوصی جج اوپی سینی نے اس پر کارتی چدمبرم کا جواب طلب کیا ہے۔ عدالت کے خصوصی جج نے کہاکہ کارتی کے وکیل ای ڈی کی اس عرضی پر 18ستمبر تک عدالت میں جواب داخل کریں جس میں ڈائریکٹوریٹ نے عدالت سے ان کی عبوری ضمانت کو منسوخ کرنے کی اپیل کی ہے۔