بنگلورو،25؍مارچ (ایس او نیوز) سابق ریاستی وزیراعلیٰ سدارامیا نے کہاکہ ذات پات نظام کے خاتمہ کے لئے ضروری ہے کہ تمام طبقات اقتصادی طور پر مستحکم ہوں۔ یہاں گاندھی بھون میں ڈاکٹر رام منوہرلوہیا سمتا یونیورسٹی، کرناٹک گاندھی میموریل فنڈ اور اسٹڈی سنٹر کے زیراہتمام منعقد ’’یوم لوہیا اورآج بھی ضروری لوہیا کتابوں کا اجراء‘‘ پروگرام سے خطاب کرتے ہوئے سدارامیا نے اس خیال کا اظہارکیا۔ انہوں نے کہاکہ ہندوستان میں لوہیا اورڈاکٹر بی آرامبیڈکر نے سماجی مسائل، اقتصادی مسائل کا گہرائی سے جائزہ لے کر حل تلاش کیا ہے۔ انہوں نے کہاکہ آج اصولوں سے اتفاق رکھنے والے غیرملکی اصولوں کو اپنا رہے ہیں لیکن لوہیا دیہی اصولوں کو اپنانے والے ایک غیر معمولی سیاستدان تھے۔ سدارامیا نے بتایا کہ رام منوہرلوہیا نے اپنی زندگی میں ملک کے لئے درکار اقتصادی ،ثقافتی ،سماجی اور سیاسی اصولوں کو عوام کے روبرو پیش کیا ہے۔ انہوں نے بلالحاظ مذہب، طبقہ، نسل اور جنسی امتیاز کے بغیرکسانوں ، خواتین ودیگرکا گہرائی سے جائزہ لے کر اپنے اصولوں میں ڈھالا ہے۔ انہوں نے بتایا کہ کرناٹک میں کاگوڑ تحریک کے روح رواں لوہیا تھے اس کے علاوہ ان کی جدوجہد سے ریاست میں لینڈ ریفارم ایکٹ لاگو ہوا اور رام کرشنا ہیگڑے جب وزیراعلیٰ تھے منڈلی پنچایت ضلع پنچایت قائم کرتے ہوئے اقتدار کو وسعت دی جس کے ذمہ دار لوہیاتھے۔ سابق وزیرکاگوڑ تمپا نے خطاب کرتے ہوئے کہاکہ لوہیا عدم تشدد پر یقین رکھتے تھے اور انہوں نے بھی ان کے نقش قدم پرچلاہے۔ قلمکار نٹراج ہلیار نے خطاب کرتے ہوئے کہاکہ لوہیا کے خیالات میں کبھی امتیاز نہیں دیکھاگیا اورموجودہ نوجوان نسل ان کے خیالات سے متاثرہے۔ امبیڈکر ، گاندھی اور لوہیا کے سنگم سے ایک نئی نسل جنم لے گی۔