کاروار یکم ؍فروری (ایس او نیوز) سن 1866ء کے بعد پہلی بار امسال نظر آنے والے بیک وقت تین بے مثال فلکیاتی واقعات یعنی چاندگرہن اور ’سوپرمون، بلیو بلڈ مون‘کا نظارہ کرنے کے لئے کاروارکے سب ڈیویژنل سائنس سنٹر میں طلباء کے لئے خصوصی اہتمام کیا گیا، جس کا لطف لیتے ہوئے بچے حیرت اور تعجب میں ڈوب گئے۔

چاند گرہن اور سورج گرہن کے تعلق سے صدیوں سے عوام کے اندر بہت ساری توہم پرستی پائی جاتی ہے۔جس میں گہن کے وقت پر کھانا نہ کھانا، گھر سے باہر نہ نکلنا، حاملہ عورت کا چپ چاپ پڑے رہنااور کوئی کام نہ کرنا وغیرہ شامل ہے۔اس وجہ سے کسی بھی گرہن کے موقع پر ایک قسم کا خوف طاری ہوجاتا ہے ۔ اس طرح کی توہم پرستی کو بچوں کے ذہن سے نکالنے کے لئے ضلع انتظامیہ اور ضلع پنچایت کے اشتراک سے کاروار کے سائنس سنٹر میں مختلف اسکولوں کے 300 طلبہ کو فلکی نظام میں پیش آنے والا نادراور بے مثال واقعہ ملاحظہ کرنے اور اس کے متعلق جانکاری حاصل کرنے کا موقع فراہم کیا گیا۔

دور درشن پر چاند گرہن کے مختلف مراحل کو ملاحظہ کرتے ہوئے طلباء پرانتہائی حیرت و استعجاب کا عالم طاری ہوگیا۔ہندو ہائی اسکول کے طالب علم اوم کار اور درشن نے بے پناہ خوشی کا مظاہرہ کرتے ہوئے کہا کہ ’’گرہن کے موقع پر کچھ بھی نہیں کھانا چاہیے ایسا اندھ وشواس پایاجاتا ہے۔ہمارے بڑوں کو اگر اس کے خلاف بولیں تو وہ لوگ مانتے نہیں ہیں۔ اب اگر ہم لوگوں میں سے یہ توہم پرستی ختم ہوجائے گی تو آنے والی نسلوں کا ذہن صاف ہوجائے گا۔‘‘

سومتی داملے اسکول کی ٹیچر سریتا رام داس نے بتایا کہ:’’اس بار ہونے والے چاند گرہن کے بار ے میں بہت زیادہ تشویش اور پریشانی تھی۔ ہم نے طلباء کو اس کی سائنسی حقیقت پوری طرح سمجھائی۔یہاں پر ماہرین نے بھی چاند گرہن کے تعلق سے پوری معلومات فراہم کی۔ اس طرح توہم پرستی دور کرنے کی کوشش کی گئی ہے۔‘‘عملی طور پر بچوں کا وہم دور کرنے کے لئے انہیں چاند گرہن کے موقع پرسوجی (اُپّیٹ) کھانے کے لئے دی گئی۔

اس سے قبل اس موضوع کے ماہر پریمیئر پی یو کالج کے لیکچرار راگھویندرا، سرکاری ڈگری کالج کے شرینواس بھٹ، سرکاری پی یو کالج کے پرکاش انویکر، اور چامراج نگر دین بندھو ٹرسٹ کے سنیل نے فلکیاتی اسرار کے تعلق سے تفصیلی معلومات طلباء کو فراہم کی۔