سرینگر، 09؍دسمبر (ایس او نیوز؍آئی این ایس انڈیا) جموں و کشمیرکے سابق وزیراعلیٰ عمرعبداللہ نے آج الیکشن کمیشن سے کہا کہ وہ الیکٹرانک ووٹنگ مشین (ای وی ایم)کے معتبرہونے پر اٹھ رہے سوالات کا جواب دے۔عبداللہ نے ٹوئٹر پر لکھاکہ ای وی ایم سے متعلق سازش کی باتوں کو میں انتہائی شک کی نظر سے دیکھتا رہا ہوں لیکن ای وی ایم مشینوں اور ان کے غلط نہ ہونے پر میرا پختہ یقین ابھی ڈگمگانے لگا ہے۔ سابق وزیر اعلی گجرات میں کچھ پولنگ اسٹیشنوں پر ای وی ایم مشینوں میں خرابی کی شکایات کے تناظر میں یہ باتیں کر رہے تھے۔ انہوں نے کہاکہ مجھے امید ہے کہ الیکشن کمیشن کوئی قدم اٹھائے گا اور ووٹنگ مشینوں کے معتبر ہونے کو لے کر اس سے پوچھے جارہے سوالات کا جواب دے گا۔