ڈی ایس پی گنپتی خود کشی معاملہ کی جانچ ،متوفی کے فرزند نیہل نے بی رپورٹ منظور کرلی
بنگلورو29؍ستمبر(ایس او نیوز)ڈی ایس پی ایم کے گنپتی کی مبینہ خود کشی کے معاملے میں ریاستی حکومت کی طرف سے کے جے جارج اور دو دیگر آئی پی ایس افسران کو کلین چٹ دیتے ہوئے جو بی رپورٹ عدالت میں درج کی گئی ، اسے گنپتی کے فرزند نیہل نے منظور کرلیا ہے۔ آج اس سلسلے میں عدالت میں سماعت کے دوران انہوں نے اس رپورٹ کے متعلق کوئی اعتراض دائر کرنے سے انکار کردیا اور اس معاملہ کو ختم کرنے پر آمادہ ہوگئے۔ نیہل کے باہر جاتے ہی گنپتی کے والد کشالپا ، ماں جاجی اور بھائی ماچیا نے حکومت کی بی رپورٹ پر اعتراضات کرنے کیلئے عدالت میں عرضی داخل کی۔ اس عرضی پر سماعت کیلئے عدالت نے 24اکتوبر کی تاریخ مقرر کی ہے۔آج صبح مرکیرہ کی جے ایم ایف سی عدالت میں حاضر ہوکر نیہل نے سی آئی ڈی کی بی رپورٹ پر کوئی اعتراض درج نہیں کیا۔ عدالت سے نکلنے کے بعد نیہل نے بتایاکہ ان کی توجہ اب تعلیم پر ہے ساتھ ہی خاندان کی ذمہ داری بھی اب ان کے کھاندوں پر آچکی ہے، اسی لئے بار بار وہ عدالت کے چکر نہیں کاٹ سکتے۔اسی لئے انہوں نے بی رپورٹ پر کوئی اعتراض درج نہیں کیا۔ 17 ستمبر کو سی آئی ڈی نے ڈی وائی ایس پی گنپتی کی خود کشی کے معاملہ میں اپنی تحقیقاتی رپورٹ عدالت کو پیش کی۔ جس میں ریاستی وزیر کے جے جارج اور دو آئی پی ایس افسران ، اے ایم این پرساد اور پرنب موہنتی کو کلین چٹ دی گئی۔