عجمان 10 اپریل (ایس او نیوز) امین سیف اللہ بی پی ایل 2018 کرکٹ ٹورنامنٹ کے فائنل میں ڈی وی ایس یونائیٹیڈ نے اپنی  فتوحات کا سلسلہ جاری رکھتے ہوئے فائنل میں بھی شاندار جیت حاصل کی اور ایک سخت مقابلے میں این جی ٹی اسٹرائکر کو شکست دے دی۔ اس طرح ڈی وی ایس اس بار کے بی پی ایل کی چمپن شپ حاصل کرنے میں کامیاب ہوگئی۔

ٹاس جیت کر پہلے بلے بازی کرتے ہوئے این جی ٹی اسٹرائکر نے بیس اوروں میں ۱۶۶ رن بنائے ۔ جس میں صفوان شانو کے ۳۶ ‘ عبادہ برماور کے ۳۵ اور سید حسین ایس ایم کے ۳۲ رن شامل ہیں ۔ 

۱۶۶ رنوں کا پیچھا کرتے ہوئے ڈی وی ایس یونائٹیڈ کے سلامی بلے باز عمران خطیب سینئر نے ۶۴ اور معتصم جاکٹی نے ۲۵ رن بنائے اس طرح ڈی وی ایس یونائیٹیڈنے 19.1 اووروں میں ۵ وکٹوں کے نقصان پرہی ۱۶۷ رنوں کا ٹارگٹ پار کرتے ہوئے  مقابلہ ۵ وکٹوں سے جیت لیااور بی پی ایل ۲۰۱۸ ٹرافی پر قبضہ جمالیا ۔ عمران خطیب کی بہترین بلے بازی کو دیکھتے ہوئے انہیں مین آف دی فائنل کے خطاب سے نوازا گیا ۔ 

ٹورنامنٹ میں مین آف دی سیریز اور بیسٹ بیٹسمن کا اعزاز عبادہ برماور کو دیا گیا، جبکہ بیسٹ بالر کا خطاب معتصم جاکٹی نے حاصل کیا۔

اس سے پہلے دو سیمی فائنل میچ کھیلے گئے تھے ۔ پہلے سیمی فائنل میں این جی ٹی اسٹرائکر نے ٹریک چارجر کوشکست دی جس میں عبادہ برماور نے صرف ۴۵ گیندوں پر دھواں دار سنچری اسکور کرتے ہوئے شائقین کرکٹ کو اپنے بہترین اسٹراک سے خوب لطف اندوز کرایا۔انہوں نے جملہ ۱۱۲ رن بنائے جس میں ۱۰ چھکے اور ۶ چو کے شامل ہیں ۔ ٹاس ہار کر پہلے بیٹنگ کرتے ہوئے این جی ٹی اسٹرائکر نے ۲۴۶ رنوں کا پہاڑ کھڑا کردیا جس میں محمد رمضان بیری کے  بھی ۵۶ رن شامل ہیں ۔ اس ٹارگٹ کا پیچھا کرتے ہوئے ٹریک چارجر کے سلامی بلے باز سید ناشط برماور نے ۲۰ رن ‘ نعمان طاہرہ نے ۴۲ اور شیث ملا نے ۴۰ رنوں کا سہارا دیا ، مگر ان کے بنائے گئے رن ٹیم کو جیت دلانے کے لئے ناکافی تھے، اور پوری ٹیم 17.2 اوورو ں میں ۱۶۸ رن ہی بنا پائی ۔ فوزان ڈی ایف نے تین وکٹ حاصل کئے۔یہ میچ ۷۸ رنوں سے این جی ٹی اسٹرائکر نے جیت لیا ۔ عبادہ برماور کو مین اف دی میچ کے خطاب سے نوازا گیا۔ ان کے بلے سے نکلنے والی اس بار کے بی پی ایل ٹورنامنٹ کی یہ پہلی سنچری تھی۔

دوسرا سیمی فائنل ڈی وی ایس یونائٹیڈ اور کے ایم وارئیر کے درمیان دوپہر میں کھیلا گیا ۔ ٹاس جیت کر پہلے بیٹنگ کرتے ہوئے ڈی وی ایس یونائٹیڈ نے ۱۹۱ رن بنائے جس میں معتصم جاکٹی کے ۶۵ ‘ محمد عمران خطیب سینئر کے ۳۵ اور عبدالمقیط کوچاپو کے قیمتی ۳۴ رن شامل ہیں ۔ کے ایم واریئر کی شروعات اچھی نہیں رہی دونوں سلامی بلے باز جلد پویلین لوٹ گئے ‘ مگر بعد میں مڈل ارڈر بلے باز عثمان غنی جوکاکو نے ۶۴ اور کپتان شہزاد اکرمی نے ۳۲ رن اسکور کرتے ہوئے اپنی ٹیم کو مشکلات سے باہر نکالنے کی ہرممکن کوشش کی ۔ لیکن ان کی اننگز ٹیم کو فائنل میں نہیں پہنچا سکی اور پوری ٹیم ۱۷۷ رنوں پر ڈھیر ہوگئی اس طری ڈی وی ایس یونائٹیڈ نے ۱۴ رنوں سے جیت حاصل کرتے ہوئے فائنل میں رسائی حاصل کی ۔ معتصم جاکٹی کی آل راونڈ کارکردگی کی بنیاد پر اُنہیں مین اف دی میچ کے خطاب سے نوازا گیا ۔ 

اختتامی تقریب میں قائد قوم ڈاکٹر ایس ایم سید خلیل الرحمن ‘ بی ایم جے ڈی صدر جناب محمد اشفاق سعدا اور ٹائٹل اسپانسر امین سیف اللہ خصوصی مدعوین تھے ۔ ہر ایک نے باری باری اپنے تاثرات پیش کرتے ہوئے  بہترین انداز میں کرکٹ ٹورنامنٹ کے انعقاد پر بی پی ایل ذمہ داران کی تعریف کی۔

تقریب کا آغاز عبدالرحمن شریف کی تلاوت سے ہوا تھا ۔  بی پی ایل چیرمین نے استقبالیہ کلمات پیش کئے تھے، جس میں انہوں نے چیمپئن ٹیم ڈی وی ایس یونائٹیڈ کے ساتھ ساتھ رنر آپ ٹیم این جی ٹی اسٹرائکر کو بھی مبارکباد دی اور آئندہ بھی بی پی ایل کو اچھے اور منظم انداز میں آرگنائز کرنے کا عندیہ دیا ۔

تقریب میں ایس ایم سید صفدر باطن کو ایچیومنٹ ایوارڈ سے نوازا گیا ، جبکہ اس بار بی پی ایل کو منظم انداز میں آرگنائز کرنے میں اہم رول ادا کرنے والے  عبدالستار لنکا کو بی پی ایل کمیٹی کی طرف سے تہنیت کی گئی ۔