درگا پوجا کمیٹی نے رافیل طیارے کو اپنی مین تھیم بنانے کا کیا فیصلہ
لکھنؤ ،15؍ اکتوبر (ایس او نیوز؍آئی این ایس انڈیا ) رافیل خریداری کے معاہدے کو لے کر ملک میں ان دنوں سیاسی ہنگامہ آرائی کے درمیان لکھنؤ کی ایک درگا پوجا کمیٹی نے اس طیارے کو اپنی مین تھیم بنانے کا فیصلہ کیا ہے۔ دارالحکومت واقع کینٹ پوجا کمیٹی نے سیاسی اکھاڑے میں تبدیل ہو چکے رافیل کو اپنے پنڈال کی مین تھیم بنانے کا فیصلہ کیا ہے۔ کمیٹی کے میڈیا سیکرٹری نے بتایا کہ ہم نے درگا پوجا پنڈال میں رافیل طیارے کی چار بڑی تمثیل لگائی ہیں۔ ہم چاہتے ہیں ماں درگا رافیل خریداری کی تمام ’رکاوٹوں‘ کو دور کرکے ہماری ایئر فورس کو اور بھی طاقتور بنائیں۔ دیوی ماں کی ’کرپا‘(کرم) ہوئی تو جہازتیار ہوکر اور ایئر فورس کو مل جائے گا۔ انہوں نے کہا کہ ہم رافیل کے دو کٹ آؤٹ کو سیلفی پوائنٹ کے پاس نصب کرائے گئے ہیں ،جبکہ باقی دو کو ’درگا ماں‘ کے منڈپ میں رکھوایا جائے گا۔ اس سوال پر کہ رافیل خریداری تو تنازعات میں ہے، پھر پوجا کمیٹی اسے اپنا تھیم کیوں بنا رہی ہے تو اس کے جواب میں انہوں نے کہا کہ وہ کسی تنازعہ میں نہیں پڑ رہے ہیں۔ ہم چاہتے ہیں کہ ملک کے شہری اور فوج کے جوان محفوظ رہیں اور رافیل ہمیں ضرور مضبوط کرے گا۔انہوں نے امید ظاہر کہ یہ تھیم لوگوں کو اپنی طرف متوجہ کرے گا ۔