بنگلورو،20؍ستمبر(ایس او نیوز) ریاست میں منشیات کے پھیلاؤ اور ان کا استعمال عام ہونے کے خلاف حکومت سخت کارروائی کو آگے بڑھارہی ہے۔ یہ بات آج نائب وزیر اعلیٰ ڈاکٹر جی پرمیشور نے کہی۔

ٹمکور یونیورسٹی میں مختلف شعبوں کا افتتاح کرنے کے بعد خطاب کرتے ہوئے انہوں نے کہاکہ منشیات کی لت سے طلبا کی زندگی برباد ہورہی ہے اور کالج بھی بدنام ہورہے ہیں اس پر روک لگانے کے لئے سخت قدم اٹھانے کی ضرورت ہے۔انہوں نے کہاکہ ٹمکور یونیورسٹی وہ تعلیمی ادارہ ہے جہاں انہوں نے تعلیم حاصل کی ہے ترقی کرتے ہوئے آج یہ یونیورسٹی میں تبدیل ہوچکا ہے۔

انہوں نے کہاکہ ٹمکور یونیورسٹی کے نئے کیمپس کی تعمیر کو جلد مکمل کرنے کی ہدایت دی گئی ہے۔ نائب وزیر اعلیٰ نے کہاکہ بحیثیت وزیر برائے اعلیٰ تعلیمات ویرپا موئیلی حکومت کے دور میں انہوں نے ٹمکور ضلع کے لئے علیحدہ یونیورسٹی کے قیام کی جدوجہد شروع کی، لیکن اس کے بعد 15 برسوں تک اس پر کوئی پیش رفت نہیں ہوپائی۔ ڈاکٹر پرمیشور نے کہاکہ ٹمکور یونیورسٹی کو ریاست میں سائنس کا ایک مرکز بنایا جانا چاہئے جہاں پر بین الاقوامی معیار کی جدید ترین تعلیم کا انتظام کیا جائے۔اسی مقصد کے لئے چار نئے چیئر آج قائم کئے گئے ہیں۔ نائب وزیراعلیٰ نے کہاکہ شعبۂ تعلیمات میں انقلابی تبدیلیاں آئی ہیں لیکن ان تبدیلیوں کے ساتھ تعلیم کے نئے شعبے قائم ہوئے ہیں اور ان شعبوں کی بدولت تحقیق وترویج کے نئے مواقع بھی میسر آئے ہیں۔

انہوں نے کہا کہ امریکی خلائی تحقیقی ادارے ناسا میں 30 فیصد سائنسدان ہندوستانی ہیں جو ملک کے لئے فخر کی بات ہے۔ ملک میں سائنس کی تعلیم کو اس نہج پر بڑھاوا دیاجانا چاہئے کہ ایسے ہی سائنسدان دنیا کے کونے کونے میں پھیل کر انسانیت کی خدمت کریں۔ تقریب کے بعد ٹمکور کو تمباکو سے آزاد شہر قرار دینے کی تحریک کا آغاز کرتے ہوئے نائب وزیراعلیٰ نے کہاکہ نوجوانوں کو تمباکو کی بیماری سے آزاد کرانے کی ضرورت ہے۔انہوں نے ان کے استعمال سے نوجوانوں کو بچانے کے لئے بیداری مہم چلانے پر زور دیا۔

انہوں نے کہاکہ ٹمکور ضلع کو تمباکو سے آزاد شہر بنانے کی مہم کافی دشوار ہے۔ 2003میں تمباکو پر پابندی لگانے کا قانون لاگو کیا گیا، لوگ یہ جانتے ہوئے بھی کہ تمباکو کینسر کا سبب ہے اس کے استعمال سے بچنے کی کوشش بھی نہیں کرتے۔ تمباکو کا استعمال کئی اموات کا سبب بھی بن چکا ہے۔ انہوں نے کہاکہ بنگلور میں تمباکو پر پابندی لگانے کی تحریک جابجا شدت سے چلائی جارہی ہے، آنے والے دنوں میں ٹمکور میں بھی ایسی ہی تحریک بڑے پیمانے پر چلائی جائے گی۔ اس موقع پر نائب وزیراعلیٰ نے تمباکو کے استعمال کے خلاف چلنے والی مہم کے لوگو کا اجراء کیا اورساتھ ہی ہوٹلوں اور باروں میں تمباکو نوشی پر پابندی لگانے کے سلسلے میں حکمنامہ بھی جاری کیا۔