خشک سالی سے متاثرہ علاقوں میں پانی کی فراہمی جاری:کرشنا بائرے گوڈا
بنگلورو20؍دسمبر(ایس او نیوز) ریاست میں خشک سالی سے متاثرہ علاقوں میں آنے والے 209 دیہاتوں کو روزانہ 409 ٹینکروں کے ذریعے پانی مہیا کرایا جارہاہے۔ ان علاقوں میں پینے کے پانی کی کوئی کمی نہ ہو اس کے لئے خاص احتیاط برتی جارہی ہے۔ ساتھ ہی خشک سالی سے متاثرہ علاقوں میں بے روزگاری نہ رہے یہ بھی یقینی بنایا جارہاہے۔
یہ بات آج ریاستی اسمبلی میں وزیر دیہی ترقیات وپارلیمانی امور کرشنا بائرے گوڈا نے بتائی۔ خشک سالی کے متعلق ایوان میں ہوئی بحث کا جواب دیتے ہوئے انہوں نے کہاکہ ان علاقوں میں پانی کی فراہمی کے لئے حکومت نے کرایے پر بورویل حاصل کئے ہیں۔ جو کسان حکومت کو بورویل فراہم کررہے ہیں انہیں ماہانہ پندرہ تا سترہ ہزار روپے دئے جارہے ہیں۔حکومت نے ریاست بھر میں ایسے 382بورویلس حاصل کئے ہیں۔
انہوں نے کہاکہ پینے کے پانی کے لئے خشک سالی سے متاثرہ ہر اسمبلی حلقے کے رکن اسمبلی کی قیادت میں قائم ٹاسک فورس کو 50لاکھ روپیوں کی رقم وزیر مالگزاری کی طرف سے مہیا کرائی گئی ہے۔اس رقم کے استعمال سے پانی کی قلت نہ ہو اس بات کو یقینی بناناہوگا۔ ٹینکروں کے ذریعے پانی کی فراہمی کے مقصد سے تمام ضلع پنچایتوں کو 1750کروڑ روپے جاری کئے گئے ہیں۔ انہوں نے کہاکہ متاثرہ علاقوں میں روزگار مہیا کرانے کے لئے بھی مناسب فنڈز فراہم کئے گئے ہیں۔ شہری علاقوں کی طرف نقل مکانی کو روکنے کے لئے بھی 900 کروڑ روپیوں تک کا فنڈ روزگار ضمانت اسکیم کے تحت مہیا کرایا گیا ہے۔