کاروار 6؍مئی (ایس او نیوز)ضلع شمالی کینرا میں سرکاری تالابو ں پر جو غیر قانونی قبضہ کیا گیا ہے اسے ہٹانے کی مہم تیز رفتاری سے جاری ہے۔ واضح رہے کہ ضلع ڈپٹی کمشنر ایس ایس نکول نے تمام تحصیلداروں اور اسسنٹ کمشنروں کو سرکیولر جاری کیا تھا کہ ضلع شمالی کینرا میں 5315ایکڑ زمین پر پھیلے2085تالابوں کے سروے اور نانپنے کا کام ایک مقررہ وقت کے اندر پورا کیا جائے ۔ اس کے ساتھ ہی جہاں کہیں بھی غیر قانونی قبضہ کیا گیا ہے اسے ہٹاکر فوری طور پر تالابوں کی حد بندی کی جائے۔

پتہ چلا ہے کہ ڈی سی کے اس حکم کی تعمیل میں سروے اور غیر قانونی قبضہ ہٹانے کی مہم جو شروع کی گئی ہے اس کے تحت اب تک25ایکڑ 21گُنٹے زمین پر پھیلے 62تالابوں کی زمین پر کیے گئے غیر قانونی قبضے کو ہٹادیا گیا ہے۔دیگر تعلقہ جات میں بھی سرکاری افسران اس مہم کو تیز رفتاری سے انجام دینے میں لگے ہونے کی خبر یں مل رہی ہیں۔تاکہ آنے والے مانسون سے پہلے تمام تالاب کی صفائی اور حد بندی کا کام ہوسکے اور قدرتی طور پر پانی ذخیرہ کرنے کا انتظام ہوسکے۔

کہا جاتا ہے کہ ضلع ڈی سی نے اپنے متعلقہ افسران کو واضح ہدایت دے رکھی ہے کہ سرکاری تالابوں پر کسی کو بھی اور کسی بھی قیمت پر ناجائز قبضہ کرنے کاموقع نہ دیں۔اس کے علاوہ ان تالابوں کی ترقی اور بہتری کے لئے منصوبہ بنانے اور اس پر عمل پیرائی کی ذمہ داری متعلقہ گرام پنچایتوں کو سونپتے ہوئے کہا گیا ہے اس ضمن میں ضلع پنچایت کی طرف سے ضروری تعاون کیا جائے گا۔