بنگلورو۔18؍اپریل(ایس او نیوز) کرناٹکا پردیش کانگریس کمیٹی کی صدارت پر فی الوقت وزیر داخلہ ڈاکٹر جی پرمیشور ہی برقرار رہیں گے۔انہیں ہٹانے یا کسی اور کو مقرر کرنے کا سوال ہی نہیں اٹھتا۔ فی الوقت کے پی سی سی صدارت کا عہدہ خالی نہیں ہے، اسی لئے اس عہدہ کو حاصل کرنے کیلئے کسی طرح کی دوڑ کی خبریں بھی غلط ہیں۔ یہ بات آج آل انڈیا کانگریس کمیٹی کے جنرل سکریٹری ڈگ وجئے سنگھ نے کہی۔

آج شہر میں کانگریس قائدین کے ساتھ طویل میٹنگ کے بعد اخباری نمائندوں سے بات چیت کرتے ہوئے انہوں نے کہاکہ بحیثیت کے پی سی سی صدر ڈاکٹر جی پرمیشور بہترین طریقے سے کام کررہے ہیں۔ وہ فی الوقت صدر کے عہدہ پر بنے ہوئے ہیں اور یہ عہدہ خالی ہونے والا نہیں ہے۔ پارٹی کے صدر کی تبدیلی کب کرنی ہے یہ فیصلہ اعلیٰ کمان کی طرف سے کیا جائے گا۔ اس موقع پر ڈگ وجئے سنگھ نے کہاکہ پارٹی کے سبھی قائدین کو تاکید کی گئی ہے کہ پارٹی صدارت یا دیگر امور پر برسر عام بحث یا بیان بازی قطعاً نہ کی جائے۔گنڈل پیٹ اور ننجنگڈھ اسمبلی حلقوں کے ضمنی چناؤ کے نتائج پر اپنا ردعمل ظاہر کرتے ہوئے ڈگ وجئے سنگھ نے کہاکہ ان انتخابات کے نتائج سے یہ ضرور ثابت ہوچکا ہے کہ ریاست کے طاقتور لنگایت طبقہ کے ووٹوں پر بی جے پی کی اجارہ داری کا دعویٰ کھوکھلا ہے۔ دونوں حلقوں میں لنگایت طبقے کی آبادی بہت زیادہ ہے۔ اس کے باوجود بھی اس طبقے نے کانگریس کا ساتھ دیا اور وزیر اعلیٰ سدرامیا کی قیادت پر اعتماد کیا ہے، انہوں نے کہاکہ وزیراعلیٰ سدرامیا کی قیادت پر جہاں عوام نے اعتماد کی مہر لگائی ہے وہیں ریاستی بی جے پی صدر بی ایس یڈیورپا جو خود کو ریاست میں لنگایتوں کا مسیحا قرار دیتے ہیں ان کو یہ خوش فہمی ہوگئی تھی کہ سبھی لنگایت بی جے پی کا ساتھ دیں گے، لیکن ضمنی انتخابات میں اس طبقے نے ترقی کا ساتھ دیا ہے۔ڈگ وجئے سنگھ نے اس موقع پر انتخابات میں پارٹی کیلئے جدوجہد کرنے والے قائدین اور کارکنوں کا شکریہ ادا کیا۔ ریاستی کابینہ میں توسیع اور لیجسلیٹیو کونسل کی تین نشستوں کیلئے نامزدگی کے متعلق سوال پر ڈگ وجئے سنگھ نے کہاکہ اس پر فیصلہ وزیر اعلیٰ سدرامیا کے اختیار پر چھوڑ دیا گیا ہے۔ مناسب وقت آنے پر سدرامیا اپنی وزارت میں ردوبدل کے متعلق فیصلہ لیں گے، جبکہ کونسل کی تین مخلوعہ نشستوں کیلئے نامزدگی بہت جلد کی جائے گی۔ اس دوران بتایاجارہاہے کہ وزیر اعلیٰ سدرامیا کے خیمہ نے پارٹی قیادت کو یہ باور کرانے کی کوشش بسیار کی کہ آنے والے اسمبلی انتخابات میں کانگریس پارٹی اسی وقت کامیاب ہوسکے گی جب کے پی سی سی صدارت کیلئے کسی کل وقتی رہنما کا تقرر ہوجائے۔ تاہم اعلیٰ کمان نے فی الوقت ڈاکٹر پرمیشور کو اس عہدہ پر برقرار رکھنے کا فیصلہ لیا ہے۔