ڈاکٹر محمد ریحان نے’’ دیر پا ترقی کے لیے قابلِ تجدید توانائی‘‘ موضوع پر منعقدہ کل ہند سیمینار میں کلیدی خطبہ پیش کیا
علی گڑھ:8/ اگست (ایس او نیوز/آئی این ایس انڈیا)علی گڑھ مسلم یونیورسٹی (اے ایم یو) کے الیکٹرسٹی ڈپارٹمنٹ کے ممبر انچارج اور گرین یونیورسٹی پروجیکٹ کے کنوینرڈاکٹرمحمدریحان نے انسٹی ٹیوشن آف انجینئرس کے زیرِ اہتمام غازی آباد میں’’ دیر پا ترقی کے لئے قابلِ تجدیدتوانائی‘‘موضوع پرمنعقدہ کل ہند سیمینار میں شرکت کرکے کلیدی خطبہ پیش کیا۔ڈاکٹر محمد ریحان نے اپنے خطبہ میں ماحولیات کے موافق توانائی کے فروغ کے لئے گرڈ سے منسلک سولر پاور کی اہمیت پر روشنی ڈالی۔ انہوں نے کہا کہ علی گڑھ مسلم یونیورسٹی میں متبادل توانائی کے فروغ کے قومی مشن کے تحت بڑے پیمانے پر سولر پاور پینلس لگائے گئے ہیں جن سے یونیورسٹی کیمپس میں استعمال کے لئے متبادل توانائی پیدا کی جا رہی ہے۔ انہوں نے اس ضمن میں در پیش مسائل اور ان کے حل پر بھی سیر حاصل گفتگو کی۔