بھٹکل 13؍اکتوبر (ایس او نیوز) سرکار کی طرف سے 23اکتوبر سے 6نومبر تک گھر گھر پہنچ کرکوڑھ کے مرض کی جانچ اور اس کو جڑ سے ختم کرنے کی مہم شروع کی جائے گی۔ یہ کوڑھ یا جذام (Leprosy )کی روک تھام کے لئے ملک گیر پیمانے پرچلائی جانے والی مہم ہے۔
کوڑھ ایک جِلدی مرض ہے جس کی ابتدائی علامات جس پر سفید یا گلابی دھبوں کی شکل میں ظاہر ہوتی ہیں۔ اس سلسلے میں عوامی بیداری اور مہم میں رضا کارانہ تعاون طلب کرنے کے لئے تحصیلدار کے دفتر میں منعقدہ میٹنگ میں تعلقہ ہیلتھ آفیسر (ٹی ایچ او) ڈاکٹر مورتی راج بھٹ نے بتایا کہ ریاست کے پانچ اضلاع میں اس مرض کی جانچ مہم چلائی جائے گی اور اس میں ضلع شمالی کینر ابھی شامل ہے۔ بھٹکل تعلقہ میں آشا رضاکار مضافاتی علاقوں میں جانچ کے لئے تعاون کریں گے ، لیکن شہری علاقوں میں سماجی اداروں کی طرف سے رضاکارانہ تعاون ضروری ہے۔انہوں نے اس مرض کی علامات اور اس کی تشخیص کے سلسلے میں اہم باتیں حاضرین کے سامنے پیش کیں۔
میٹنگ کی صدارت کرتے ہوئے تحصیلدارویریندرا باڈکر پولیو، طاعون وغیرہ جیسی خطرناک بیماریوں کو ختم کرنے کی جو کامیاب مہمات چلائی گئی ہیں، اسی طرح جذام کو ختم کرنے کی مہم میں بھی عوام کو حکومت کا ہاتھ بٹانے پر زور دیا اور سماجی خدمات انجام دینے والے اداروں کو اس میں تعاون کرنے کی درخواست کی۔ میٹنگ میں تنظیم کے جنرل سکریٹری الطاف کھروری، بلدیہ صدر محمدصادق مٹا، صدیقہ محمد میراں، مناظر حسین سکری، انڈین میڈیکل ایسو سی ایشن کے صدر ڈاکٹر صراف اور دیگر معززین حاضر تھے۔