کولکاتہ،17؍جون(ایس او نیوز) مغربی بنگال کی وزیراعلی ممتا بنرجی نے ہفتہ کو کہا کہ جو لوگ ان پر مسلمانوں کے پولرائزیشن کا الزام لگاتے ہیں وہ نہ ہندووں کے دوست ہیں اور نہ ہی مسلمانوں کے خیر خواہ ہیں۔ ممتا نے کہا کہ کچھ لوگ مجھ پر مسلمانوں کے پولرائزیشن کا الزام لگاتے ہیں ، ان سے میرا سوال ہے کہ کیا ہندوں سے پیار کرنے کا مطلب مسلمانوں سے نفرت کرنا ہے۔ میں سبھی کمیونٹی اور مذاہب کا احترام کرتی ہوں اور ان سےپیار کرتی ہوں۔ ملک ہر کسی کا ہے۔

انہوں نے ریڈ روڈ پر عید الفطر کا تہوار منانے کیلئے جمع ہوئے لوگوں سے کہا کہ جو لوگ یہ کہتے ہیں کہ میں مسلمانوں کا پولرائزیشن کرتی ہوں ، وہ نہ تو ہندووں کے دوست ہیں اور نہ ہی مسلمانوں کے دوست ہیں۔ خیال رہے کہ بی جے پی اور کچھ دیگر تنظیمیں الزامات لگاتی رہی ہیں کہ ممتا بنرجی سیاسی فائدے کیلئے مسلمانوں کے پولرائزیشن کی سیاست کرتی ہیں۔

وزیر اعلی نے کہا کہ یہ ان کی مخالفت کی وجہ سے ہوا ہے کہ نیتی آیوگ کی جو میٹنگ ہفتہ کو ہونے والی تھی ، وہ اب اتوار کو ہوگی۔ انہوں نے کہا کہ مرکزی حکومت کے افسران سے میرا سوال ہے کہ کیا انہیں یہ معلوم نہیں تھا کہ 16 جون کو عید کا تہوار منایا جائے گا۔ نیتی آیوگ کی میٹنگ اس دن کیوں رکھی گئی ؟ میں نے مرکزی حکومت کو خط لکھ کر اپیل کی تھی کہ تاریخ تبدیل کی جائے ، تاکہ میٹنگ عید کے دن نہ ہو۔