لکھنؤ،22مارچ (ایس او نیوز؍آئی این ایس انڈیا) بی ایس پی سربراہ مایاوتی نے جمعہ کو کہا کہ نریندر مودی حکومت بڑھتی ہوئی بے روزگاری اور غربت، کارکنوں کی حالت زار اور کسانوں کی بدحالی سے متعلق سرکاری اعداد و شمار ووٹ کی خاطر چھپائے ہوئے ہے۔

مایاوتی نے ٹویٹ کر مودی حکومت پر حملہ بولا اور طنز کرتے ہوئے کہا کہ رافیل سودے کی خفیہ فائل اگر چوری ہو گئی تو غم نہیں، لیکن ملک میں روزگار کی گھٹتی شرح اور بڑھتی ہوئی بے روزگاری اور غربت، کارکنوں کی حالت زار، کسانوں کی بدحالی وغیرہ کے سرکاری اعداد و شمار عام نہیں ہونے چاہیے۔انہوں نے کہا کہ ووٹ کی خاطر انہیں چھپائے رکھنا ہے۔کیا ملک کو ایسا ہی چوکیدار چاہئے؟ بی ایس پی سپریمو نے کہا کہ بی جے پی کے وزیر اور لیڈران پی ایم مودی کی دیکھا دیکھی’چوکیدار‘ بن گئے ہیں۔