بنگلورو:22/جولائی (ایس او نیوز) سابق وزیراعلیٰ اور ریاستی بی جے پی صدر بی ایس یڈیورپا نے وزیراعلیٰ سدرامیا اور ریاستی حکومت پر الزام لگایا ہے کہ آنے والے اسمبلی انتخابات میں کانگریس کیلئے فنڈز یکجا کرنے حکومت تالابوں کا ڈی نوٹی فکیشن کرانے پر اتر آئی ہے، شیموگہ میں اخباری نمائندوں سے بات چیت کرتے ہوئے یڈیورپانے کہاکہ عوامی مخالفت کے باوجود حکومت کی طرف سے ڈی نوٹی فکیشن کی جو پہل کی جارہی ہے، اس کی وجہ سے ریاست کے مفادات متاثر ہوں گے۔ اس ڈی نوٹی فکیشن کو روکنے کیلئے ضرورت پڑی تو سپریم کورٹ میں مفاد عامہ عرضی دائر کی جائے گی۔ انہوں نے کہاکہ اس سے پہلے ریاستی وزراء نے ہی تالابوں کے ڈی نوٹی فکیشن کی مخالفت کی ہے  لیکن انتخابات چونکہ سرپر ہیں ان کیلئے فنڈز اکھٹا کرنے کیلئے تالابوں کاسہارالیا جارہاہے۔ انہوں نے اس کیلئے مختلف سرکاری عہدیداروں کے علاوہ اراکین اسمبلی کو بھی ذمہ دار ٹھہرایا۔ یڈیورپا نے کہاکہ تالابوں کی حفاظت کرنا ریاست کی اولین ذمہ داری ہے۔ ریاستی حکومت کی طرف سے کرناٹک کیلئے علیحدہ صوبائی پرچم اپنانے کی پہل کو غیر آئینی قرار دیتے ہوئے یڈیورپا نے کہاکہ کسی بھی حال میں صوبائی پرچم لہرانے کی اجازت کسی کو نہیں دی جانی چاہئے۔ مرکزی حکومت نے اس سلسلے میں بارہا واضح کردیا ہے، لیکن آنے والے اسمبلی انتخابات میں اپنا سیاسی الو سیدھاکرنے کیلئے وزیراعلیٰ سدرامیا یہ حربہ اپنارہے ہیں۔