بلگام کی سیاست سے دور رہنے ڈی کے شیوکمار کو سدرامیا کامشورہ
بنگلورو،21؍ستمبر(ایس او نیوز) سابق وزیر اعلیٰ اور ریاستی حکمران اتحاد کے سربراہ سدرامیا نے ریاستی وزیر برائے آبی وسائل ڈی کے شیوکمار سے کہا ہے کہ ریاست میں کانگریس جے ڈی ایس مخلوط حکومت اپنی میعاد مکمل کرے یہ یقینی بنانا ہر کانگریسی کی ذمہ داری ہے۔ہمارے ذاتی اختلافات کی وجہ سے اس حکومت کے استحکام پر اثر پڑے ایسا ہرگز نہ ہونے دیا جائے۔
آج ڈی کے شیوکمار اور کے پی سی سی صدر دنیش گنڈو راؤ سے ملاقات کے دوران سدرامیا نے کہا کہ ڈی کے شیوکمار اپنے آپ کو بلگاوی کی سیاست سے دور ہی رکھیں اور وہاں کے امور میں مداخلت نہ کریں۔ انہو ں نے کہاکہ بلگاوی کی سی ایل ڈی بینک کے لئے ڈائرکٹروں کا انتخاب حکومت کے لئے پریشانی کا سبب بنا ہوا ہے۔ انہوں نے کہاکہ ڈی کے شیوکمار اگر وہاں کی رکن اسمبلی لکشمی ہبالکر کا ساتھ نہ دیا ہوتاتو شاید اتنا بڑا تنازعہ کھڑا نہیں ہوتا۔ انہوں نے کہاکہ ہمارے ذاتی اختلافات جو بھی ہوں انہیں پارٹی کی سطح پر نپٹایا جاسکتا ہے۔ان اختلافات کو اتنا بڑھنے نہ دیا جائے کہ حکومت کے استحکام کے لئے خطرہ بن جائیں۔
انہوں نے کہاکہ بلگاوی کے جارکی ہولی برادران کی طرف سے حکومت کو گرانے کی حدتک کوشش محض اس بینک کے انتخاب کی وجہ سے کی گئی ۔ آئندہ اس طرح کے حالات پیدا نہ ہوں اس بات کو یقینی بنایا جائے۔ سدرامیا نے کہاکہ ڈی کے شیوکمار کو رام نگرم اور بلاری اضلاع کا انچارج بنایا گیا ہے اور دو اہم قلمدان سونپے گئے ہیں ان کو بخوبی نبھانے کی کوشش کریں ۔ اس مرحلے میں ڈی کے شیوکمار نے سدرامیا سے کہاکہ وہ پچھلے چند دنوں سے علیل تھے ابھی اسپتال سے رخصت ہوئے ہیں بلگام کی سیاست میں کیا ہورہا ہے اس سے انہیں کچھ لینا دینانہیں ہے۔