کانگریس پارٹی میں برقرار رہوں گا: اومیش جادھو
بنگلورو،4؍فروری(ایس او نیوز) کانگریس پارٹی میں برقرار رہوں گا ۔6فروری کو بنگلور میں منعقد ہورہے لیجس لیچرس اجلاس میں شرکت کروں گا ۔ اس بات کی وضاحت چنچولی کے رکن اسمبلی ڈاکٹر اومیش جادھو نے کی۔
کانگریس سرگرمیوں سے ناراض جادھو نے آج نامہ نگاروں کو بتایا کہ ریاستی حکومت کے مشترکہ سیشن کے پہلے دن کانگریس لیجس لیچرس پارٹی ( سی ایل پی) اجلاس طلب کئے جانے کی اطلاع ہے ۔ اس اجلاس میں شریک رہوں گا ۔ ضلع کے کسی بھی قائد نے مجھ سے رابطہ نہیں کیا ۔ میرے حلقہ میں کئی مسائل ہنوز حل طلب ہیں۔ سڑک ، مکانات کے تعمیری کاموں پر منفی اثر پڑا ہے ۔ وسائل کی عدم دستیابی سے ٹھیکہ داروں کی ادائیگی بروقت نہیں ہوپارہی ہے۔
ضلع نگراں کار وزیر پرینک کھرگے کی جانب سے دےئے گئے ان کے رابطہ میں نہ آنے والے بیان پر رد عمل ظاہر کرتے ہوئے جادھو نے کہا کہ مجھ سے رابطہ کرنے والوں کے لئے ہمیشہ میں دستیاب رہتا ہوں۔ مستقبل کے سیاسی موقف کے سلسلہ میں پوچھے گئے سوال پر جادھو نے کہا کہ آنے والے دنوں میں اپنے سیاسی اقدام کے حوالے سے میں تذبذب میں ہوں۔ بی جے پی قائدین میرے رابطہ میں نہیں ہیں ۔ عوام کے ساتھ راست رابطہ میں ہوں۔اب تک عوام کے ساتھ تین راؤنڈ کے اجلاس ہوئے ہیں ۔ انسداد دل بدلی ضابطہ سے مجھے ڈر نہیں ہے ، پارٹی کے سینئر قائدین سے کئے گئے وعدہ کے مطابق 6فروری کے سی ایل پی اجلاس میں حصہ لوں گا ۔
دریں اثناء کلبرگی میں کے پی سی سی ایس ٹی شعبہ کے ریاستی کنوینر شیوا نند کولور نے کہا کہ اومیش جادھو کی بی جے پی میں شمولیت یقینی ہے۔ لیکن یہ جادھو کی حمایت کرنے والوں میں سے نہیں ہیں۔ انہوں نے الزام عائد کرتے ہوئے کہا کہ جادھو نے حلقہ کے دفادار کانگریسیوں کو نظر انداز کیا ہے ۔ وزارت نہ ملنے کی وجہ سے وہ پارٹی مخالف ہوگئے ہیں۔ حلقہ میں رونما مسائل حل نہ کرکے وہ سیاست کررہے ہیں۔ جادھو بی جے پی میں جانا چاہتے ہیں تو جاسکتے ہیں چنچولی کے وفادار کانگریسی قائدین پارٹی نہیں چھوڑیں گے۔