نئی دہلی،17؍مارچ(ایس او نیوز؍آئی این ایس انڈیا)تمل ناڈو نے وجے ہزارے ٹرافی کرکٹ ٹورنامنٹ کے فائنل میں جگہ بنا لی ہے۔وکٹ کیپر دنیش کارتک( 77)اور کپتان وجے شنکر (ناٹ آووٹ 53)کی نصف سنچریوں کی بدولت تمل ناڈو نے وڈودرہ کو6 وکٹ سے شکست دے دی۔تمل ناڈو اگر یہ خطاب جیتنے میں کامیاب رہا تو یہ اس کا پانچواں خطاب ہو گا ۔اس سے پہلے 2009-10سیزن میں تمل ناڈو کی ٹیم فائنل میں پہنچی تھی ۔دہلی کے فیروز شاہ کوٹلہ میدان پر وڈودرہ نے ٹاس جیت کر پہلے بلے بازی کرنے کا فیصلہ کیا، تمل ناڈو کے گیند بازوں نے شاندار گیندبازی کا مظاہرہ کرتے ہوئے پہلے وڈودر ہ کی ٹیم کو 49.3اووروں میں 219رنون پر آوٹ کر دیا اور پھر 47.3اووروں میں چار وکٹ کے نقصان پر ہدف حاصل کر لیا۔وڈودرہ کی ٹیم کو اپنے اسٹار بلے باز یوسف پٹھان، عرفان پٹھان اور کرنال پانڈیا سے بہتر کارکردگی کی امید تھی، لیکن یہ توقعات پر کھرے نہیں اتر سکے۔وڈودرہ کی ٹیم کی جانب سے کیدار دیودھر نے 46، آدتیہ واگھ مارے نے 45، کرنال پانڈیا نے 30، پنال شاہ نے 36، کپتان عرفان پٹھان نے 27رن بنایا ۔ٹیم کے لیے کیدار دیودھر اور آدتیہ واگھ مورے نے پہلے وکٹ کے لیے 92رن کی شراکت کی لیکن اس کے بعد اس کے وکٹ مسلسل گرنے شروع ہو گئے اور 50اووروں سے پہلے ہی وڈودرہ کی پوری ٹیم پویلین لوٹ گئی ۔تمل ناڈو کے لیے اشون کرائسٹ، ایم محمد اور واشنگٹن سندر دو دو وکٹ حاصل کرنے میں کامیاب رہے۔جواب میں کھیلتے ہوئے دنیش کارتک اور وجے شنکر کی اننگ کی مدد سے تمل ناڈو کو ہدف حاصل کرنے میں ذرا بھی پریشانی نہیں ہوئی۔کارتک نے اپنی اننگ کے دوران 107گیندوں کا سامنا کرتے ہوئے چار چوکے لگائے۔وجے شنکر کی 53رنوں کی اننگ میں بھی چار ہی چوکے شامل رہے۔وڈودرا کی جانب سے اے سیٹھ نے تین وکٹ حاصل کیا ۔