کرناٹکا کانگریس صدر دنیش گنڈو راؤ نے بی جے پی کوقرار دیا دہشت گرد؛ کہا؛ بی جے پی ملک کی اقلیتوں اور کمزور طبقات کو دہشت زدہ کرنے میں ہے مصروف
بنگلورو،20؍اگست(ایس او نیوز)کرناٹکا پردیش کانگریس کمیٹی کے صدر دنیش گنڈو راؤ نے بی جے پی کو دہشت گرد قوت قرار دیا ہے۔
آج کے پی سی سی دفتر میں سابق وزیراعظم آنجہانی راجیو گاندھی اور سابق وزیراعلیٰ آنجہانی دیوراج ارس کے جنم دن کی تقریبات میں حصہ لیتے ہوئے انہوں نے کہاکہ سناتھن دھرم کے نام پر بی جے پی اپنے کارندوں کے ذریعے ملک کی اقلیتوں اور کمزور طبقات کو دہشت زدہ کرنے میں لگی ہوئی ہے۔
انہوں نے کہا کہ بی جے پی اور آر ایس ایس قائدین ملک کے لئے ترقیاتی نظریہ رکھنے سے کوسوں دور ہیں۔ سناتھن دھرم کا نظریہ رکھنے والے کارکنوں نے ہی صحافی گوری لنکیش ، نریندر دھابولکر ، گووند پنسارے اور ایم ایم کلبرگی کا قتل کیاہے۔ ان قاتلوں کو کیفرکردار تک پہنچانے کے لئے ایک طرف قانونی ایجنسیاں جدوجہد میں مصروف ہیں تو دوسری طرف بی جے پی اور آر ایس ایس ان دہشت گردوں کی تائید میں کھڑی ہوئی ہیں۔ اس سے ظاہر ہوتاہے کہ یہ دونوں قوتیں دہشت گرد ہیں۔
انہوں نے کہاکہ گوری لنکیش کے قاتلوں کا پتہ لگانے میں ریاستی پولیس نے غیر معمولی سرعت سے کام لیا ، لیکن مہاراشٹرا کی بی جے پی حکومت نے اب تک پنسارے اور دابولکر کے قاتلوں کا پتہ لگانے سے وہاں کی پولیس کو روک رکھا ہے۔ یہ محض اس لئے کہ بی جے پی اور آر ایس ایس سے وابستہ کارکن نے یہ حرکت کی ہے،اگر کوئی مسلمان ایسی حرکت کرتاتو اس کے سارے خاندان کو نشانہ بنالیا جاتا ۔ سابق وزیراعظم آنجہانی اٹل بہاری واجپائی کی آخری رسومات کے دوران سوامی اگنی ویش پر حملے کو انہوں نے بی جے پی کی سوچ کا عکاس قرار دیا۔ اس موقع پر سابق وزیراعلیٰ سدرامیا، کے پی سی سی کارگزار صدر ایشور کھنڈرے اور دیگر کانگریس لیڈر موجود تھے۔
