گوری لنکیش قتل معاملے میں وزیر اعظم خاموش کیوں؟: دنیش گنڈوراؤ
شیموگہ،30؍اگست (ایس او نیوز) معروف صحافی گوری لنکیش کے قتل کے معاملے میں وزیر اعظم نریندر مودی نے اب تک کسی طرح کا رد عمل ظاہر نہیں کیا ہے اور خاموشی اختیار کئے ہوئے ہیں اس کا مطلب کیا ہے؟ یہ سوال کے پی سی سی صدر دنیش گنڈو راؤ نے کیا۔
انہوں نے یہاں گزشتہ روز شہر میں طلب کردہ اخباری کانفرنس سے خطاب کرتے ہوئے کہا کہ وزیر اعظم نریندر مودی کی طرف سے گوری لنکیش قتل معاملے میں نرم رویہ اختیار کیا گیا ہے، یہ کہاں کا انصاف ہے، ان کی خاموشی کئی طرح کے سوالات کھڑا کررہی ہے۔ بی جے پی قیادت والی مرکزی این ڈی اے حکومت تمام شعبوں میں ناکام ہوئی ہے اور ملک کے عوام کو مایوس کررکھا ہے، بدعنوانیاں عروج پر ہیں۔ خواتین اور بچوں پر مظالم بڑھتے جارہے ہیں، کالا دھن واپس لانے کے وعدے میں حکومت کامیاب نہیں ہوسکی ہے اس طرح بے روز گاروں کیلئے روزگار کے مواقع فراہم کرنے کے معاملے میں بھی مرکزی حکومت ناکام ہوئی ہے، روزمرہ کی اشیاء کی قیمتوں میں مسلسل اضافہ کے سبب عوام پریشان ہیں۔
دنیش گنڈو راؤ نے کہا کہ کانگریس پارٹی سماج کو متحد کرنے کا کام کرتی ہے اور ہم سب ایک ہیں کے اصول وضوابط اس کے ساتھ وابستہ ہے مگر بی جے پی ذات پات اور مذہب کے نام پر سماج کو توڑنے کا کام کرتی آرہی ہے۔ انہوں نے بتایا کہ مقامی بلدیاتی اداروں کے انتخابات کے نتائج آئندہ لوک سبھا انتخابات کیلئے مشق ثابت ہوں گے۔مرکزی حکومت کے چار سالہ مدت کار سے عوام بیزار ہوچکے ہیں، بی جے پی اپنے انتخابی منشور میں کئے ہوئے وعدوں کو پورا کرنے میں بھی ناکام ہے۔ بی جے پی ترقی کے نام پر ووٹ مانگنے کے قابل نہیں رہی ہے، بلکہ عوام کے جذبات اور مذہب کی بنیاد پر ووٹ مانگنے کی کوشش کررہی ہے۔اس اخباری کانفرنس میں منجوناتھ بھنڈاری، سرینواس کے بی پرسنا کمار، ایچ ایم چندر شیکھرپا، این رمین، اسماعیل خان اور دیگر نے شرکت کی۔