اقتدار پر قبضہ کرنے بی جے پی کا خواب کبھی پورا نہیں ہوگا: دنیش گنڈو راؤ
بنگلورو12؍ستمبر(ایس او نیوز) کے پی سی سی صدر دنیش گنڈو راؤ نے کہا ہے کہ ریاست کے اقتدار پر قابض ہونے بی جے پی کا خواب کبھی شرمندۂ تعبیر نہیں ہوگا۔ نائب وزیراعلیٰ ڈاکٹر جی پرمیشور سے ملاقات کے بعد اخباری نمائندوں سے بات چیت کرتے ہوئے انہوں نے کہاکہ بلگام میں پی ایل ڈی بینک کے انتخابات کی وجہ سے کانگریس سے ناراض ریاستی وزیر رمیش جارکی ہولی سے ڈاکٹر پرمیشور نے بات چیت کی ہے اور انہوں نے واضح کیا ہے کہ وہ یا ان کے گروپ کا رکن اسمبلی بی جے پی میں شامل نہیں ہورہا ہے۔
انہوں نے کہاکہ رمیش جارکی ہولی نے یہ بھی واضح کیا ہے کہ پارٹی قائدین سے ان کے اختلافات بھلے ہی سنگین ہوں ، لیکن انہیں پارٹی کے دائرے میں ہی سلجھا لیا جائے گا۔انہوں نے کہاکہ ریاستی حکومت کو کمزور کرنے میں بی جے پی پہلے دن سے لگی ہوئی ہے۔ لیکن ان کوششوں کو ہرگزکامیاب ہونے نہیں دیا جائے گا۔
انہوں نے کہاکہ بذات خود رکن اسمبلی ہونے کے ناطے وہ جانتے ہیں کہ کیسے کیسے لالچ دئے جاتے ہیں۔ پھر بھی پارٹی کے اصولوں اور پروگراموں سے انہیں پورا اتفاق کرتے ہوئے انہوں نے کبھی اس سے انحراف نہیں کیا۔انہوں نے کہاکہ کانگریس کے متعدداراکین اسمبلی کو بھاری رقومات وزارت اور دیگر طریقوں سے لالچ دینے کی کوشش ناکام ہونے کے بعد بی جے پی بوکھلا گئی ہے۔
دنیش گنڈو راؤ نے کہاکہ رمیش جارکی ہولی نے بارہا واضح کیا ہے کہ وہ کانگریس چھوڑ کر جانے والے نہیں ہیں ، پھر بھی فرضی خبریں اچھال کر بی جے پی کی طرف سے ریاست کے سیاسی ماحول کو پراگندہ کرنے اور یہ تاثر دینے کی کوشش کی جارہی ہے کہ حکمران اتحاد میں کچھ بھی ٹھیک نہیں ہے۔
دنیش گندو راؤ نے کہاکہ رمیش جارکی ہولی پانچ مرتبہ رکن اسمبلی منتخب ہوچکے ہیں اور وزیر بھی رہ چکے ہیں اسی لئے وہ ایسا کوئی احمقانہ فیصلہ نہیں کریں گے جس سے ان کا اپنا سیاسی مستقبل بھی خطرے میں پڑھ جائے۔