بی جے پی پر لگام کسنے کانگریس کی حکمت عملی؛ پارٹی لیڈروں سے تبادلۂ خیال کیلئے ڈگ وجئے سنگھ کی بنگلور آمد
بنگلورو۔17؍اپریل(ایس او نیوز) اے آئی سی سی جنرل سکریٹری وانچارج برائے کرناٹک ڈگ وجئے سنگھ آج رات دورۂ بنگلور پر پہنچ رہے ہیں۔ان کے اس دورے کا مقصد آنے والے اسمبلی انتخابات میں کانگریس پارٹی کو مستعد کرنے اور بی جے پی پر لگام کسنے کے سلسلے میں حکمت عملی وضع کرنا ہے۔ وزیر اعلیٰ سدرامیا، کے پی سی سی صدر ڈاکٹر جی پرمیشور اور پارٹی کے دیگر لیڈروں سے ڈگ وجئے سنگھ ابھی سے بی جے پی پر لگام کسنے کی حکمت عملی پر تبادلۂ خیال کریں گے، اس مقصد کیلئے شہر کی ایک معروف فائیو اسٹار ہوٹل میں ڈگ وجئے سنگھ کے قیام کے انتظامات کے ساتھ وزراء اور پارٹی لیڈروں سے میٹنگ کا انتظام بھی کیاگیا ہے۔
ننجنگڈھ اور گنڈل پیٹ اسمبلی حلقوں کے ضمنی انتخابات میں کانگریس پارٹی نے جیت کیلئے جس طرح کے مثالی اتحاد کا مظاہرہ کیا، اسے دیکھتے ہوئے ڈگ وجئے سنگھ نے اسمبلی انتخابات میں بھی اس طرح کے اتحا د کو برقرار رکھنے کی تاکید پارٹی لیڈروں کو کی ہے۔ فی الوقت اعلیٰ کمان نے کے پی سی سی صدارت سے ڈاکٹر پرمیشور کو ہٹائے جانے کے امکان کو مسترد کردیاہے، اور واضح طور پر یہ اشارے مل رہے ہیں کہ اگلے اسمبلی انتخابات میں کانگریس پارٹی کی قیادت سدرامیا اور ڈاکٹر پرمیشور ہی کریں گے۔ اس کے بعد ریاستی وزارت کی دو مخلوعہ نشستوں کو پر کرنے کے مسئلے پر بھی ڈگ وجئے سنگھ کے دورہ کے دوران بات چیت ہوگی۔ ریاستی لیجسلیٹیو کونسل کی تین نشستوں کیلئے نامزدگیوں کا اختیار حالانکہ اعلیٰ کمان نے وزیر اعلیٰ سدرامیا کو دے دیاہے، پھر بھی ڈگ وجئے سنگھ سے اس سلسلے میں ایک اور بار بات چیت کی جائے گی۔ ضمنی انتخابات میں کامیابی کے متعلق اعلیٰ کمان کو رپورٹ پیش کرنے کیلئے وزیر اعلیٰ کے حالیہ دورۂ دہلی کے دوران انہوں نے صدر کانگریس سونیا گاندھی اور نائب صدر راہول گاندھی سے ملاقات کرکے وزارت کی دو مخلوعہ نشستوں کو پرکرنے کے متعلق بات چیت کی، لیکن اس سلسلے میں ابھی تک سدرامیا کو کوئی ہدایت نہیں ملی ہے۔ قیاس کیاجارہاہے کہ ڈگ وجئے سنگھ اس سلسلے میں اعلیٰ کمان کا پیغام سدرامیا تک پہنچائیں گے۔