بنگلوروشہر کے تمام 28؍اسمبلی حلقوں میں ڈیالیسس سنٹر قائم ہوں گے ڈیالیسس مریضوں کے لئے مالی امداد دی جائے گی:رام لنگا ریڈی
بنگلورو،7؍مارچ(ایس او نیوز) ڈیالیسس کے مریضوں کو علاج ومعالجہ کی خاطر بی پی ایل کارڈ ہولڈرس کے لئے 250؍ روپئے اور اے پی ایل کارڈ ہولڈرس کے لئے 450؍روپئے دیئے جائیں گے۔ یہ باتیں ریاستی وزیر داخلہ رام لنگاریڈی نے بتائیں۔ آج یہاں بی ٹی ایم لے آؤٹ اسمبلی حلقہ کے مڈیوال وارڈ نمبر 172 کی حدود میں سنجیونی ڈیالیسس سنٹر کا افتتاح کرتے ہوئے رام لنگا ریڈی نے کہاکہ 5.50؍کروڑ روپئے کی لاگت سے یہ ڈیالیسس سنٹر قائم کیا گیاہے۔ انہوں نے کہاکہ تمام 28؍اسمبلی حلقوں میں بھی اس قسم کے ڈیالیسس سنٹرز قائم کئے جائیں گے۔ فی الحال 5؍ڈیالیسس مراکز تعمیر کئے گئے ہیں۔ بقیہ مراکز بہت جلد تعمیر کئے جائیں گے۔ انہوں نے مزید کہاکہ سنجیونی اسپتال جملہ 16؍ بستروں پر مشتمل ہے۔ ہربیڈ کے ساتھ علاحدہ بیٹری سسٹم اور کمروں کے لئے اے سی کا اہتمام کیاگیاہے۔ انہوں نے کہاکہ اس اسپتال میں بھی پرائیویٹ اسپتال کی مانند تمام سہولتیں ووسائل فراہم کئے گئے ہیں۔ انہوں نے مزید کہاکہ نگر وستھوا اسکیم کی امدادی رقم کے تحت ڈیالیسس کے مراکز تعمیر کئے جارہے ہیں۔ تمام مراکز آئی آر ڈی ایس ادارہ کو سونپ دیئے گئے ہیں۔ آئی آر ڈی ایس کی جانب سے فی الحال بی بی ایم پی کے زیر اہتمام چلنے والے ڈیالیسس سنٹرز کو بڑی عمدگی کے ساتھ آگے بڑھایا جارہاہے۔ آئی آر ڈی ایس اچھے انداز میں ڈیالیسس سنٹرز کو چلارہے ہیں۔ اس لئے ہم نے اس ادارہ کو سونپنے کا ارادہ کیا۔ اس موقع پر انہوں نے کہاکہ مڈیوال مارکیٹ حدود میں دکانوں کی تعمیر کے لئے 35؍کروڑ روپئے جاری کئے گئے ہیں۔ رام لنگا ریڈی نے کہاکہ جھونپڑ پٹی (سلم) علاقوں کے رہائشیوں اور سرکاری جگہوں پر قیام رکھنے والے رہائشیوں کو حق ملکیت کا پروانہ (حق پترا) تقسیم کاری عمل میں لائی جارہی ہے۔ اس ضمن میں ابتدائی کارروائی کا آغاز ہوچکاہے۔ رام لنگا ریڈی نے کہاکہ 10؍کروڑ روپئے کی لاگت سے ایک عمدہ بڑی لائبریری تعمیر کی جائے گی۔ سلم میں رہائش پذیر عوام کو مکانات کی تعمیر کے لئے فی کس 5؍لاکھ روپئے دیئے گئے ہیں۔ 13؍ہزار سرکاری ملکیت کی اراضی بازیافت کی گئی ہے۔ بازیافت سرکاری اراضی پر ایک لاکھ مکانات تعمیر کرنے کے لئے اقدام کیاجارہاہے۔ ان گھروں کو حاصل کرنے کے لئے عوام سے آن لائن عرضیاں طلب کی گئی ہیں۔ اس موقع پر ریاستی وزیر کے جے جارج، میئر سمپت راج، مقامی پالیکے رکن بی این منجوناتھ ودیگر افراد شریک رہے۔