بنگلورو،23؍اکتوبر(ایس او نیوز؍عبدالحلیم منصور) سابق وزیراعظم اور جنتادل (ایس) سربراہ ایچ ڈی دیوے گوڈا نے آج بارش سے بری طرح متاثر چترادرگہ ، داونگیرے ، بلاری اور ہاویری اضلاع کا دورہ کیا۔ ان کی طرف سے ان اضلاع میں دوروں کا یہ سلسلہ کل بھی جاری رہے گا یہاں پر بارش کے سبب تباہ ہونے والے بھٹے کی فصل کے کاشتکاروں سے ملاقات کریں گے اور ان کاشتکاروں کو مناسب مدد دینے کے سلسلے میں اپنے جائزہ کے بعد وزیراعلیٰ سدرامیا اوروزیر اعظم نریندر مودی کو مکتوب روانہ کریں گے۔ آج داونگیرے کے دیوی کیرے ، گاندھی نگر ، ہرپن ہلی ، ارسیکرے ، کمتھ ہلی ، ہڑگلی اور دیگر مقامات کا دیوے گوڈا نے معائنہ کیا ، کل وہ گدگ ضلع کے شرہٹی ، مندرگی ، جالی گیرے اور ہاویری ضلع کے مختلف مقامات کا دورہ کرکے بارش کی تباہی کا جائزہ لیں گے۔