بنگلورو،22؍نومبر(ایس او نیوز) سابق وزیراعظم اور جے ڈی ایس کے قومی صدر ایچ ڈی دیوے گوڈا نے وزیراعلیٰ ایچ ڈی کمار سو امی کو مشورہ دیا ہے کہ گنے کے کاشتکاروں کے مسائل کو سلجھایا جائے اور مختلف کارخانوں کی طرف سے کاشتکاروں کو واجب الادا رقم کی جلد ادائیگی یقینی بنائی جائے۔ بتایاجاتا ہے کہ دیوے گوڈا نے کسانوں کے ساتھ وزیراعلیٰ کی بات چیت کے سلسلے میں خود انہیں طلب کرکے تفصیلات معلوم کیں اور وزیر اعلیٰ کو مشورہ دیا کہ مصیبت زدہ کسانوں کو آسانی فراہم کرنے کے لئے حکومت کی طرف سے جو کچھ ممکن ہو کیا جائے۔ شکر کے کارخانوں پر یہ پابندی لگائی جائے کہ وقت مقررہ میں وہ کسانوں کو واجب الادا رقم ادا کردیں اور اگلے ماہ بلگاوی میں لیجسلیچر کے سرمائی اجلاس کی شروعات سے قبل ہی رقم کی ادائیگی یقینی بنائی جائے۔ دیوے گوڈا نے وزیر اعلیٰ کو آگاہ کیا کہ بلگاوی لیجسلیچر اجلاس سے قبل ہی اگر کسانوں کے قرضوں کی ادائیگی کے لئے قدم اٹھائے نہیں گئے تو بلگاوی اجلاس میں حکومت کے لئے مشکلات کھڑی کی جاسکتی ہیں۔ اس کے علاوہ اپوزیشن پارٹیاں بھی حکومت کے لئے درد سر بن سکتی ہیں۔ جے ڈی ایس خاص طور پر کسانوں کے مفادات کے تحفظ کے تئیں بارہا جس طرح کی پابندی کا اعادہ کرتی آرہی ہے اس کو عملی جامہ پہناتے ہوئے وزیر اعلیٰ کمار سوامی کو چاہئے کہ گنے کے کاشتکاروں کی جائز مانگوں کو پورا کرنے اور انہیں شکر کے کارخانوں سے واجب الادا رقم فوراً ادا کرنے کے لئے مناسب قدم اٹھائیں۔