بنگلورو،15؍اکتوبر(ایس او نیوز) سابق وزیر اعظم ایچ ڈی دیوے گوڈا نے طے کیا ہے کہ تین لوک سبھا اور دو اسمبلی حلقوں کے ضمنی انتخابات کے مرحلے میں وہ اپنے دو کٹر سیاسی حریفوں سابق وزیراعلیٰ سدرامیا اور ریاستی وزیر آبی وسائل ڈی کے شیوکمار کے ہمراہ ایک ساتھ انتخابی مہم میں حصہ لیں گے۔

ریاست میں کانگریس جے ڈی ایس اتحاد کے مضبوط ہونے کا پیغام عوام کو دینے کے مقصد سے حال ہی میں صدر کانگریس راہل گاندھی کے دورۂ بنگلور کے دوران یہ حکمت عملی اپنائی گئی۔ اس بات کا واضح ثبوت پیش کرتے ہوئے کہ سیاسی میدان میں کوئی مستقل دوست یا دشمن نہیں ہوتا، مخلوط حکومت میں شامل دونوں پارٹیوں کے سرکردہ رہنماؤں نے منڈیا اور شیموگہ میں جے ڈی ایس کے حق میں اور بلاری وجمکھنڈی میں کانگریس کے حق میں انتخابی مہم کے لئے میدان میں اترنے کا فیصلہ کیا ہے۔اسی طرح رام نگرم اسمبلی حلقے میں وزیر اعلیٰ ایچ ڈی کمارسوامی کی اہلیہ انیتا کمار سوامی کے لئے بھی یہ تمام لیڈر متحد ہوکر مہم چلائیں گے۔ جمکھنڈی اسمبلی حلقے سے کانگریس نے آنند سدو نیامے گوڈا کو میدان میں اتارا ہے۔

یہاں سابق رکن اسمبلی سدو نیامے گوڈا کی سڑک حادثے میں موت کے سبب اس حلقے میں ضمنی انتخاب ناگزیر ہوگیا تھا۔جمکھنڈی میں سدو نامے گوڈا کی ذاتی مقبولیت کے سبب اس حلقے سے کانگریس کی کامیابی یقینی بتائی جارہی ہے۔ منڈیا حلقے سے جے ڈی ایس نے گزشتہ سال کانگریس چھوڑ کر جے ڈی ایس میں شامل ہونے والے سابق بی ڈی اے چیرمین ایل آر شیورامے گوڈا کو ٹکٹ دیا ہے۔ اس لئے اس حلقے میں جے ڈی ایس امیدوار کے حق میں انتخابی مہم چلانے میں کانگریس قائدین کو شاید زیادہ دشواری نہیں ہوگی۔ بتایاجاتاہے کہ بلاری میں کانگریس امیدوار وی ایس اگرپا کے حق میں بھی دونوں پارٹیوں کے سرکردہ رہنما ایک ساتھ انتخابی مہم کے لئے میدان میں اتریں گے۔ سدرامیا ، دیوے گوڈا اور ڈی کے شیوکمار ان پانچوں حلقوں میں ایک ساتھ انتخابی جلسوں سے خطاب کریں گے اور ضمنی انتخابات میں قائم ہونے والی اتحادی پہل کو لوک سبھاانتخابات تک بھی لے جانے کے لئے تجربے کو کامیاب بنانے کی کوشش کریں گے۔