اس سال کا والمیکی ایوارڈ سابق وزیراعظم دیوے گوڈا کو
بنگلورو،23؍اکتوبر(ایس او نیوز) ریاستی حکومت نے فیصلہ کیا ہے کہ عوامی خدمات کے شعبے میں دئے جانے والے سالانہ والمیکی ایوارڈ سے اس بار سابق وزیراعظم ایچ ڈی دیوے گوڈا کو سرفراز کیا جائے گا۔ درج فہرست طبقات کی فلاح کے لئے جدوجہد کے عوض ریاستی حکومت کی طرف سے والمیکی جینتی کے موقع پر ہر سال یہ اعزاز کسی نہ کسی شخصیت کو دیا جاتا ہے۔ وظیفہ یاب جج جسٹس ناگ موہن داس کی قیادت والی کمیٹی نے اس بار ایوارڈ کے لئے مختلف شخصیتوں کے ناموں کا جائزہ لینے کے بعد حکومت کو مشورہ دیا ہے کہ اس سال یہ اعزاز سابق وزیراعظم کو دیا جائے۔ اس ایوارڈ میں پانچ لاکھ روپے نقد اور مومنٹو شامل ہے۔ کل والمیکی جینتی کے موقع پر ودھان سودھا کے بینکویٹ ہال میں منعقدہونے والی تقریب میں وزیر اعلیٰ ایچ ڈی کمار سوامی دیوے گوڈا کو اس اعزاز سے سرفراز کریں گے۔ ریاستی وزیر برائے سماجی بہبود پریانک کھرگے نے آج پدمانابھا نگر میں دیوے گوڈا کی رہائش گاہ پہنچ کر انہیں اس تقریب اعزاز میں شرکت کے لئے مدعو کیا۔ اور گزارش کی کہ ریاستی حکومت کی طرف سے دئے جانے والے والمیکی اعزاز کو منظور کریں۔