کرناٹک کے لئے دیوے گوڈا کی دین، 50صفحات پر مشتمل دستاویز منظر عام پر
بنگلورو،19؍جولائی(ایس او نیوز)شمالی کرناٹک کی ترقی کے لئے سابق وزیراعظم ایچ ڈی دیوے گو ڈا کی طرف سے بحیثیت ریاستی وزیر آبی وسائل اور بحیثیت وزیراعلیٰ کرناٹک جو بھی فنڈز جاری کئے گئے ہیں ان کے متعلق آج سابق رکن اسمبلی وی ایس وی دتہ نے 50 صفحات پر مشتمل تفصیلات منظر عام پر لائیں۔
ایک اخباری کانفرنس سے خطاب کرتے ہوئے انہوں نے کہاکہ سابق وزیراعلیٰ جگدیش شٹر نے سوال کیا ہے کہ شمالی کرناٹک کی ترقی کے لئے دیوے گوڈا نے کیا کیاہے؟۔ یہ الزام لگایا ہے کہ دیوے گوڈا کے دور میں شمالی کرناٹک سے ناانصافی ہوئی ہے۔ وائی ایس وی دتہ نے اس الزام کو بے بنیاد ثابت کرتے ہوئے شمالی کرناٹک کی ترقی کے لئے دیوے گوڈا کے کرناٹک اور مرکز میں دور اقتدار کے دوران جاری کئے گئے فنڈز اور اس سے متعلق حکمنامے منظر عام پر لائے ہیں۔ انہوں نے کہاکہ شمالی کرناٹک کی ترقی کے متعلق قرطاس ابیض جاری کرنے جگدیش شٹر کے مطالبے کا وہ خیر مقدم کرتے ہیں۔
مرکزی حکومت کو بھی چاہئے کہ شمالی کرناٹک کی ترقی کے لئے اب تک اس نے جو فنڈز جاری کئے ہیں اس پر قرطاس ابیض جاری کرے،اگر مرکزی حکومت نے جاری نہیں کیا تو وہ قرطاس سیاہ جاری کرنے کے لئے تیار ہیں۔ انہوں نے کہاکہ دیوے گوڈا نے اپنی 55 سالہ سیاسی زندگی میں بحیثیت وزیر آب پاشی ، وزیر اعلیٰ اور وزیر اعظم چھ سال چار ماہ اقتدار پر رہے۔ اپنی اس مدت کے دوران انہوں نے شمالی کرناٹک کے لئے جو بھی کام کیا ہے وہ 50صفحات پر مشتمل ہے، خاص طور پر بچاوت کمیشن کی ہدایت کے مطابق کرناٹک کو 734 ٹی ایم سی فیٹ پانی 2000 تک استعمال کرنا تھا۔
1996 میں بحیثیت وزیر اعلیٰ اس پانی کو استعمال کرنے کے لئے انہوں نے قدم اٹھائے۔ ان کے اس قدم کی بدولت شمالی کرناٹک کے عوام نے راحت کی سانس لی، انہوں نے کہاکہ دیوے گوڈا کی کوششوں سے کرناٹک کے لئے ایک مخصوص جنوب مغربی ریلوے ز ون قائم ہوا اور ساتھ ہی بحیثیت وزیراعظم ہبلی میں ریلوے ورک شاپ کے قیام کو منظوری دی۔ہبلی انکولہ ریلوے لائن کے لئے دیوے گوڈا کے دور میں فنڈز منظور کئے گئے ، اس کے علاوہ بنیادی انفرااسٹرکچر سے جڑے منصوبوں کو بھی دیوے گوڈا کے دور میں منظور کیا گیا۔