بنگلورو،15؍ جولائی(ایس او نیوز) شہر میں ڈینگواور چکون گنیا کے واقعات میں اضافہ تشویشناک ہے۔اس سے نمٹنے کیلئے اسپتالوں کو ضروری کارروائی کرنے کی ہدایت دی گئی ہے۔ یہ بات آج شہر کی میئر جی پدماوتی نے بتائی۔ انہوں نے کہاکہ ڈینگو اور چکون گنیا کے سبب اب تک شہر میں کوئی بھی جان تلف نہیں ہوئی ہے۔ تاہم جہاں بھی ڈینگو اورچکون گنیا بخار کی تصدیق کی جارہی ہے وہاں خصوصی احتیاط برتنے پبلک ہیلتھ سنٹرس اور دیگر اسپتالوں وغیرہ کو ہدایت دی گئی ہے۔ انہوں نے کہاکہ شہر کے 465نرسنگ ہوم کو بی بی ایم پی نے ہدایت دی ہے کہ ڈینگو اور چکون گنیا میں مبتلا ہوکر آنے والوں کا پوری احتیاط کے ساتھ علاج کیا جائے۔ انہوں نے بتایاکہ اب تک شہر میں ڈینگو اور چکون گنیا کے 1981 معاملات سامنے آئے ہیں۔ ان میں سے بیشتر کو علاج مہیا کرانے کیلئے احتیاطی قدم اٹھائے جاچکے ہیں۔ ڈینگو اور چکون گنیا میں اگر کسی بھی مریض کو اسپتالوں نے مبتلا پایا تو ان کی فوری ذمہ داری ہے کہ اس کے متعلق بی بی ایم پی کو مطلع کریں۔ میئر نے کہاکہ ان دونو ں امراض سے بچاؤ کیلئے عوامی بیداری مہم چلانی ہوگی۔ اس موقع پر بی بی ایم پی کمشنر منجوناتھ پرساد اور دیگر اعلیٰ افسران بھی میئر کے ہمراہ رہے، منجوناتھ پرساد نے بتایاکہ سرکاری اور نجی اسپتالوں میں ڈینگو اور چکون گنیا کے معاملات کی جانچ کرکے ، جانچ کے نتائج ویب سائٹ پر شائع کئے جائیں گے۔ اس کے ساتھ ہی مریضوں کی تعداد اگر نہ ہونے کے برابر ہے تو یہ بھی شائع کیا جائیگا۔ چیف ہیلتھ آفیسر لوکیش نے بتایاکہ اسپتالوں کو ویب سائٹ اور ایس ایم ایس کے ذریعہ ڈینگو اور چکون گنیا کے متعلق مریضوں کی جانکاری مہیا کرانے کیلئے وقتاً فوقتاً اطلاع دی جائے گی اور ساتھ ہی اس سلسلے میں میڈیا کے مختلف حلقوں میں آنے والے خبروں سے بھی اسپتالوں کو آگاہ کرایا جائے گا۔انہوں نے کہاکہ جن مریضوں میں ڈینگو پائے جانے کی تصدیق ہوجائے ان کا پتہ اور دیگر تمام تفصیلات بی بی ایم پی کومہیا کرانا اسپتالوں پر لازم ہے۔ جس علاقہ میں ڈینگو پھیلے بی بی ایم پی پہلے وہاں پر کسی بھی جگہ پر پانی جمع ہونے کی گنجائش نہیں رکھے گی اور بڑے پیمانے پر فاگنگ کروائے گی۔اس مقصد کیلئے ہر اسمبلی حلقہ کو تین کروڑ روپے مہیا کرائے گئے ہیں۔