احمد آباد 2دسمبر (ایس او نیوز/آئی این ایس انڈیا )  گجرات ا نتخابات کی مہم میں شریک ہوئے سابق وزیر ا عظم منموہن سنگھ نے نوٹ بندی اور جی ایس ٹی پر موجودہ پی ایم مودی کو تنقید ی حصار میں مقید کر دیا ۔ایک پریس کانفرنس میں منموہن نے نو ٹ بندی کی وجہ سے بینکوں کے باہر قطار میں کھڑے 100 لوگوں کی موت پر دکھ کا اظہار کیا ۔

 غور طلب ہے کہ 8 نومبر کی رات کو وزیر اعظم مودی نے 500 اور 1000 روپے کے نوٹ کو بند کرنے کاغیر معقول اعلان کرکے ملک کے باشندوں کو حیرت زدہ کر دیا تھا ۔ منموہن سنگھ نے کہامیں دکھ اور درد کے ساتھ پوری ذمہ داری سے یہ کہہ رہا ہوں کہ 8 نومبر کا دن ہندوستانی معیشت اور جمہوریت کے لئے سیاہ ترین دن تھا۔ انہوں نے کہا کہ میں قطار میں کھڑے 100 لوگوں کی موت سے رنجیدہ ہوں ۔سابق وزیر اعظم نے پی ایم مودی پر نشانہ لگاتے ہوئے کہا کہ پنڈت جواہر لال نہرو اور سردار پٹیل کا موازنہ کرنے سے مودی جی کو کچھ حاصل نہیں ہونے والا ہے ؛ بلکہ خود ان کی متلون شخصیت عوام کے سامنے ظاہر ہوتی ہے ۔ یہ پوچھے جانے پر کہ وہ کیوں نہیں پی ایم مودی کی طرح اپنے پس منظر کے بارے میں لوگوں سے بات کرتے ہیں، منموہن نے کہا، 'میں اپنے پس منظر کے بارے میں اطلاع دے کر کہ ملک مجھ پر ترس کھائے ، میں اس مسئلے پر مودی کے ساتھ کسی طرح کا مقابلہ نہیں کرنا چاہتا ۔ سابق وزیر اعظم نے یہاں کہا کہ ابھی یہ کہنا جلد بازی ہوگی کہ جولائی ستمبر سہ ماہی میں جی ڈی پی 6.3 فیصد شرح نمو کے طور پر اقتصادی بحران کا رخ پھر گیا ہے، کیونکہ اس میں چھوٹے اور درمیانے علاقوں کے اعداد و شمار درج نہیں ہیں، جسے نوٹ بندی اورسراسیمگی کے عالم میں نافذ کئے گئے جی ایس ٹی کی وجہ سے بڑا نقصان اٹھانا پڑا ہے۔ انہوں نے جولائی ستمبر سہ ماہی کے 6.3 فیصد ترقی کی شرح کا خیر مقدم کیا، لیکن خبردار کیا کہ یہ نتیجہ پر خوش ہونا جلدبازی ہوگی کہ معیشت کے تناسب میں بہتری آئی ہے۔گجرات میں پیشہ ور افراد اور تاجروں سے خطاب کرتے ہوئے سنگھ نے کہا کہ اس سلسلے میں نتیجہ اخذ کرنا جلدبازی ہوگی کہ معیشت میں گراوٹ کا تناسب ختم ہو گیا ہے، جو گذشتہ پانچ چوتھائی سے دیکھی جارہی تھی ۔ کچھ ماہرین اقتصادیات کا خیال ہے کہ سی ایس او جو اعداد و شمار جاری کرتا ہے ۔جو حق بجانب جی ایس ٹی اور نوٹ بندی سے ہونے والے خسارہ کا تخمینہ نہیں لگایا جاتا ہے ۔