نوٹ بندی فیل؟نقلی کرنسی میں 5گنا اضافہ، سرکار کی رپورٹ میں ہوا انکشاف
نئی دہلی ،20؍اپریل (ایس او نیوز؍ آئی این ایس انڈیا ) ملک کے بینکوں نے ابھی تک کے سب سے زیادہ نقلی نوٹ پکڑے ہیں۔ ساتھ ہی نوٹ بندی کے بعدمشتبہ لین دین میں480فیصد اضافہ ہواہے۔ یہ سب نوٹ بندی کے بعد مشکوک جمع نوٹوں پر تیار کی گئی ایک سرکاری رپورٹ میں پتہ چلاہے۔رپورٹ میں کہاگیاہے کہ پرائیویٹ ، پبلک اور کوآپریٹیو سیکٹر سمیت سبھی بینکوں اور دیگر فائنانشیل انسٹی ٹیوشن نے مشترکہ طورپر 2017-2016میں 400فیصدی زیادہ مشکوک لین دین کی رپورٹ کی ہے۔ ایسے ٹرانجکشن کی تعداد4.73لاکھ ہے۔ واضح رہے کہ یہ رپورٹ مرکزی وزارت خزانہ کی فائنانشیل انٹیلی جنس یونٹ (ایف آئی یو) نے تیارکی ہے۔مرکزی وزارت خزانہ کی فائنانشیل انٹلی جنس یونٹ (ایف آئی یو)نے اپنی اس رپورٹ میں کہا ہے کہ بینکنگ اور دیگر مالیاتء چینلوں میں جعلی کرنسی کے لین دین میں گذشتہ سال کے مقابلے 2017-2016 کے دوران 3.22 لاکھ معاملے زیادہ سامنے آئے ہیں۔مالی سال 2016-2015میں جعلی کرنسی کے کل 4.10لاکھ معاملے رپورٹ ہوئے تھے۔ وہیں 2017-2016 میں ان کی تعداد بڑھ کر 7.33لاکھ ہوگئی۔ نقلی نوٹوں پر یہ تازہ اعدادوشمار ابھی تک کا سب سے زیادہ ہے۔جعلی کرنسی کے لئے رپورٹ کے اعدادوشمار کو مرتب کرنے کا کام سب سے پہلے مالی سال 2009-2008 میں شروع کی گئی تھی۔مالی سال 2017-2016 میں مشکوک لین دین رپورٹ میں 4،73،006 معاملے سامنے آئے جو2016-2015کے مقابلے چارگنا زیادہ ہے۔