اسمبلی انتخابات میں مسلم امیدواروں کو مناسب نمائندگی کا مطالبہ آئندہ ماہ کے چناؤ میں مسلمانوں کا اہم رول رہے گا۔ مناسب سیٹیں دینے وزیراعلیٰ کا تیقن
بنگلور۔11؍اپریل(ایس او نیوز) کانگریس مسلم لیڈروں پر مشتمل ایک وفد نے سابق مرکزی وزیر ڈاکٹر کے رحمن خان کی قیادت میں کل نئی دہلی میں وزیراعلیٰ سدارامیا کے پی سی سی صدر ڈاکٹر پرمیشور اے آئی سی سی جنرل سکریٹری وکرناٹک کے انچارج وینوگوپال اور ریاستی وزیر ڈی کے شیوکمار سے ملاقات کرکے مجوزہ ریاستی اسمبلی انتخابات میں مسلم امیدواروں کو مناسب نمائندگی دینے کی درخواست کی ہے۔ ان مسلم کانگریس لیڈروں نے ایک مشترکہ عرضداشت پر دستخط کرکے کانگریس اسکریننگ کمیٹی اور پارٹی ہائی کمان کو پیش کی ہے۔ اس عرضداشت میں کہاگیاہے کہ ریاست 26اسمبلی حلقے ایسے ہیں جہاں مسلمانوں کی کثیر آبادی ہے۔ یہ حلقے مسلم امیدواروں کے لئے محفوظ مانے جاتے ہیں۔ اگلے اسمبلی انتخابات میں ان حلقوں سے مسلم امیدواروں کو مناسب پارٹی ٹکٹ فراہم کرنے کا مطالبہ کیاگیاہے۔ اس کے بعدوفد نے پارٹی کے سینئر لیڈروں سے جن میں احمد پٹیل اور غلام نبی آزاد بھی شامل ہیں مسلم لیڈروں کے وفدنے ملاقات کی۔ان لیڈروں نے وفد کو تیقن دیا ہے کہ اس مطالبہ پر وہ غور کریں گے۔ کانگریس اسکریننگ کمیٹی کے اراکین سے ملاقات کرنے والے مسلم لیڈروں کے وفد میں ریاستی وزیر برائے شہری ترقیات آر روشن بیگ،رکن راجیہ سبھا ڈاکٹر سید ناصر حسین اور ریاستی اقلیتی کمیشن کے چیرمین نصیر احمد،سلیم احمد، این اے حارث، عبدالجبار، رضوان ارشد اور وائی سعید احمد شامل ہیں۔ وفد کی درخواست وصول کرنے کے بعد وزیر اعلیٰ سدارامیا نے کہا کہ کرناٹک کے آئندہ اسمبلی انتخابات میں مسلمانوں کا اہم رول رہے گا۔ انہوں نے یقین دہانی کرائی کہ اسمبلی انتخابات میں مسلم امیدواروں کو مناسب نمائندگی دی جائے گی۔