دہلی میں فضائی آلودگی مزید خراب ہوئی
نئی دہلی ،04؍دسمبر ( ایس او نیوز؍آئی این ایس انڈیا) نئی دہلی میں سری لنکا ئی کرکٹ کھلاڑیوں کو فضائی آلودگی کی وجہ ماسک لگا کر کھیلنے کے لیے مجبور ہونے کے ایک دن بعد آج قومی دارالحکومت میں فضائی آلودگی کچھ زیادہ ہوگئی ہے۔مرکزی آلودگی کنٹرول بورڈ (سی پی سی بی) کی آج کی رپورٹ کے مطابق فضائی آلودگی بڑھانے والے پارٹکلیٹ عناصر، پی ایم 2.5 اور پی ایم 10 کی سطح میں اضافہ کی وجہ سے فضائی آلودگی زیادہ ہوگئی ہے۔ سی پی سی بی کے کنٹرول پینل کی طرف سے جاری اعداد و شمار کے مطابق دہلی میں دن میں تین بجے پی ایم 2.5 کی سطح 276 اور پی ایم 10 کی سطح 455 مائیکروگرام فی مکعب میٹر تک پہنچ گئی ہے۔پی ایم 2.5 کی سطح 300 اور پی ایم 10 کی سطح 500 سے زائد ہونے پر آلودگی سے پیدا ہوئے حالات کو ہنگامی زمرے میں رکھا جاتا ہے۔عام حالت میں پی ایم 2.5 اور پی ایم 10 کے سطح بالترتیب 60 اور 100 ہونا چاہیے۔سی پی سی بی کی طرف سے جاری ہوا کے معیار انڈیکس میں بھی ہوا میں آلودگی کے عناصر کی مقدار میں اضافے کی واضح علامات بتائے گئے ہیں۔زیادہ سے زیادہ 500 پوائنٹس والے انڈیکس پر ہوا کے معیار کی سطح آج دن میں تین بجکر 30 منٹ پر 390 تک پہنچ گئی۔انڈیکس پر اسے سنگین زمرے میں دکھایا گیا ہے۔کل یہ 351کی سطح پر تھی۔