نرسری داخلہ پر دہلی ہائی کورٹ نے فیصلہ محفوظ رکھا، 27کو آئے گا فیصلہ
نئی دہلی،22فروری(ایس او نیوز/آئی این ایس انڈیا)دہلی میں نرسری داخلہ معاملے میں دہلی ہائی کورٹ نے فیصلہ محفوظ رکھ لیا ہے۔ہائی کورٹ 27فروری کو فیصلہ سنائے گا۔دہلی ہائی کورٹ پہلے ہی پڑوسی معیار والے نوٹیفکیشن پر عبوری روک لگا رکھی ہے۔کورٹ نے کہا تھا کہ یہ نوٹیفکیشن من مانے اور امتیازی ہیں۔جسٹس منموہن نے حکم دیا تھا کہ یہ عبوری روک تب تک جاری رہے گی جب تک نجی اسکولوں سے متعلق درخواستوں کا مکمل طور پرنمٹارا نہیں ہو جاتا،تاہم کورٹ نے اسکولوں کو حکم دیا کہ وہ نرسری داخلے سے متعلق درخواست پڑوسی کی بنیاد پر ہی قبول کریں۔آپ کو بتا دیں کہ درخواست گزاروں نے دہلی حکومت کی نرسری میں داخلے کے لئے 19دسمبر، 2016اور سات جنوری، 2017کے نوٹیفکیشن کو چیلنج کیا تھا۔نوٹیفکیشن میں کہا گیا تھا کہ ڈی ڈی اے کی زمین پر بنے اسکول نرسری میں داخلہ لینے کے لئے پڑوسی کے معیار کو نافذ کریں گے۔اس بارے میں اہم اطلاع سے دہلی کے 298نجی اسکول متاثر ہو رہے تھے،اسکولوں کا کہنا تھا کہ ان کے مفادات کو نقصان نہیں ہونا چاہئے اور حکومت کو طالب علموں کے درمیان کوئی امتیاز نہیں کرنا چاہئے۔ان کا کہنا تھا کہ انہیں ڈی ڈی اے کی زمین الاٹ کرتے وقت بھی پڑوسی کا معیار طے نہیں کیا گیا تھا۔ہائی کورٹ نے مرکز اور دہلی حکومت سے کہا تھا کہ وہ اسکولوں کا الاٹمنٹ خط دکھائیں جس کی بنیاد پر پڑوسی کا معیار طے کیا گیا ہے۔اسکولوں کا کہنا تھا کہ حکومت کا نوٹیفکیشن قانون کے مطابق نہیں ہے اور یہ بنیادی حقوق کی خلاف ورزی کرتے ہیں۔