دہلی میونسپل کارپوریشن الیکشن:امریندر، نتیش کریں گے دہلی میں تشہیر
نئی دہلی:24/مارچ(ایس او نیوز/آئی این ایس انڈیا)پنجاب کے وزیر اعلی اور کانگریس کے اسٹار کمپینر کیپٹن امریندر سنگھ راجوری گارڈن اسمبلی ضمنی انتخابات اور دہلی میونسپل کارپوریشن انتخابات کے پیش نظر 30/مارچ سے دہلی میں انتخابی مہم کریں گے۔وہیں کارپوریشن انتخابات میں پوروانچل کے رائے دہندگان کو لبھانے کے لیے بہار کے وزیر اعلی اور جنتا دل یونائیٹڈ کے صدر نتیش کمار بھی دہلی میں انتخابی ریلیاں کریں گے۔اس سلسلہ میں اطلاع دیتے ہوئے دہلی کانگریس کمیٹی کے صدر اجے ماکن نے کہا کہ 30/مارچ کو دہلی میں امریندر سنگھ کا شاندار استقبال کیا جائے گا، جس کے بعد وہ انتخابی مہم کا آغاز کریں گے۔اس کے لیے پروگرام کو حتمی شکل دی جا رہی ہے۔ماکن نے کہا کہ آج کیپٹن امریندر فیس بک پر رائے دہندگان سے براہ راست روبرو ہو رہے ہیں۔اس پروگرام کو ’دلی کی بات دل کے ساتھ‘کا نام دیا گیا ہے۔دوسری طرف، دہلی میونسپل کارپوریشن انتخابات کے پیش نظر بہار کے وزیر اعلی اور جنتا دل یونائیٹڈ کے صدر نتیش کمار بھی دہلی میں انتخابی مہم کریں گے۔پارٹی کے قومی جنرل سکریٹری اور دہلی انچارج سنجے جھا نے بتایا کہ جے ڈی یو صدر نتیش کمار 9/اپریل کو دہلی میں دو ریلیاں کریں گے۔پہلی ریلی صبح کے وقت شمالی دہلی اور دوسری ریلی شام کو جنوبی دہلی میں ہوگی۔پارٹی جنرل سکریٹری نے کہا کہ دہلی میں رہ رہے پوروانچل کے رائے دہندگان وزیر اعلی نتیش کمار کے خطاب کو لے کر بہت پرجوش ہیں۔انہوں نے آپ کے 400کارکنوں کے جلد ہی جے ڈی یو میں شامل ہونے کی بات بھی کہی۔