دہلی حکومت نے ٹیچر کے خاندان کو ایک کروڑ روپے معاوضے کا اعلان کیا
نئی دہلی، 27؍ستمبر(ایس او نیوز ؍آئی این ایس انڈیا )دہلی حکومت نے مغربی دہلی کے نانگلوئی علاقے میں کلاس میں دو طلبہ کی طرف سے مبینہ طور پر چاقو گھساکر قتل کئے گئے سرکاری اسکول کے استاد مکیش کمار کے اہل خانہ کو ایک کروڑ روپے معاوضہ دینے کا آج اعلان کیا ہے۔نائب وزیر اعلی منیش سسودیا نے اس معاوضے کا اعلان کیا اور اس معاملے کی مجسٹریٹ سطح کی تحقیقات کا حکم دیا جس سے یہ پتہ چل سکے کہ اسکول حکام یا ہسپتال میں کوئی لاپرواہی تو نہیں کی گئی۔سسودیا نے کہا کہ یہ ایک بہت تکلیف دہ واقعہ ہے اور حکومت اسے بہت سنجیدگی سے لیتی ہے۔دہلی کابینہ نے کمار کے خاندان کو ایک کروڑ روپے معاوضہ دینے کا فیصلہ کیا ہے اور ہم کمار کے خاندان کی ہر ممکن مدد کریں گے۔قابل ذکر ہے کہ کل نانگلوئی میں کلاس 12کے دو طالب علموں نے کلاس میں اپنے ہم جماعتوں کے سامنے ہندی کے ٹیوٹر مکیش کمار کو مبینہ طور پر چاقو گھونپ کر قتل کردیا۔ملزم طالب علموں میں سے ایک کو کمار نے کلاس میں کم حاضری کے لئے نکال دیا تھا۔کمار کی کل رات ہسپتال میں علاج کے دوران موت ہو گئی۔سسودیا کو جب اس واقعہ کے بارے میں پتہ چلا تو وہ کل کمار کے گھر گئے۔ملزمان میں سے ایک طالب علم نابالغ ہے اور اسے حراست میں لیا گیا ہے، جبکہ دوسرے طالب علم کو گرفتار کیا گیا ہے۔