دہلی میں سڑک حادثہ متاثرین کا علاج سرکاری اخراجات سے ہوگا
نئی دہلی،12؍دسمبر (ایس او نیوز؍آئی این ایس انڈیا ) دہلی میں ایسی پالیسی جلد ہی آنے والی ہے جس میں سڑک حاد ثات کے متاثرین کا علاج سرکاری اخراجات سے ہوگا گرچہ متاثر کسی نجی ہسپتال میں کیوں نہ ایڈمیٹ ہوجائے دہلی حکومت پورے اخراجات کرے گی۔ دہلی کی عام آدمی پارٹی حکومت نے حاد ثات کے پیش نظر اس پالیسی کی منظور کیے جانے کے لیے ایل جی کے پاس بھیجا ہے ، توقع ہے کہ جلد ہی ایل جی اس پر اپنی تائید کی مہر ثبت کریں گے ۔اب تک اس سلسلے میں محض سڑک حادثات کے متاثرین کوسرکاری اسپتال میں ایڈمیٹ ہونے کے بعد ہی سرکاری مراعات ملا کرتی تھیں ؛لیکن اس قدم سے اب نجی ہسپتال میں بھی ایڈمیٹ ہونے پر سرکاری اخراجات سے علاج ہوگا۔دہلی کے وزیر صحت ستیندر جین نے بتایا کہ دہلی کی سرحد میں اگر کوئی سڑک حادثہ میں زخمی ہوتا ہو، کوئی زخم لگا ہو یا آگ میں جلا ہو یا تیزابی حملے کا شکار ہوا ہو خواہ وہ کسی ریاست کا شہری ہو ، دہلی سرکار بلاتفریق متاثر کا علاج اپنے سرکاری خرچ پر کرائے گی ۔ واضح ہو کہ اس ذیل میں سرکاری اسپتالوں میں پہلے سے ہی مفت علاج کی سہولت فراہم تھی اب نجی اسپتال کو بھی اس سے جوڑ دیا گیا ہے ۔ وزیر صحت نے کہا کہ دہلی میں ہر سال تقریبا 8000 حادثات پیش آتے ہیں۔جس میں 15۔20 ہزار افراد زخمی بھی ہوتے ہیں اور تقریبا 1600 افراد حادثات کی وجہ سے لقمہ اجل بھی بن جاتے ہیں۔لہذا دہلی سرکار نے اس کی ضرورت محسوس کرتے ہوئے اس کی پہل کی ہے ۔ قومی راجدھانی خطہ دہلی ریاست کے وزیر صحت ستیندر جین نے کہا کہ ہم اسے ایل جی کے پاس بھیجیں گے اور توقع ہے کہ ہمیں اس سلسلے میں جلد ہی منظوری بھی مل جائے گی ۔