ریاست کرناٹک کابینہ کی توسیع میں تاخیر کا امکان
بنگلورو، 16دسمبر (ایس او نیوز؍یو این آئی) نائب وزیر اعلیٰ ٖ ڈاکٹر جی پرمیشور نے آج کہا کہ کانگریس صدر راہل گاندھی کی مصروفیات اور پارٹی اعلیٰ کمان کی طرف سے ہری جھنڈی نہ ملنے کے سبب 22 دسمبر کو ریاست میں کابینہ کی مجوزہ توسیع ملتوی ہو سکتی ہے ۔
مسٹر پرمیشورنے یہاں اپنی رہائش گاہ پر صحافیوں سے گفتگو کے دوران کہا کہ کانگریس اراکین اسمبلی کی میٹنگ 18 دسمبر کوبلگاوی میں ہوگی۔ سابقہ پروگرام کے مطابق اس میں جے ڈی ایس کے رہنما اور وزیر اعلیٰ ایچ ڈی کمارا سوامی کو بھی مدعو کیا گیا ہے ۔ میٹنگ میں کانگریس کے ان اراکین اسمبلی کی شکایتوں پرغور کیا جائے گا ،جو اس بات پر غیر مطمئن ہیں کہ ان کے علاقے میں جے ڈی ایس کے وزیر ترقیاتی کاموں کو نظر انداز کر رہے ہیں۔انہوں نے بتایا،‘راہل گاندھی اس وقت ان ریاستوں میں پارٹی کے مسائل حل کرنے میں مصروف جہاں کانگریس کو اسمبلی انتخابات میں اکثریت حاصل ہوئی ہے ۔ اراکین اسمبلی کی میٹنگ کے بعد وقت ملتے ہی میں مسٹر گاندھی سے ملاقات کے لئے دہلی جاؤں گا۔ کابینہ میں توسیع یقینی ہے ،لیکن مسڑ گاندھی کی مصروفیت کے سبب اس میں مزید تاخیر ہو سکتی ہے ۔ پارٹی اعلیٰ کمان کی جانب سے ہری جھنڈی ملنے کے بعد تاریخ کا اعلان کر دیا جائے گا۔جب ان کی توجہ اس جانب مبذول کرائی گئی کہ شمالی کرناٹک کے کچھ کانگریسی رہنما اعلیٰ کمان سے ملاقات کے لئے نئی دہلی جا رہے ہیں تو انہوں نے کہا ،‘ اس میں غلط کیا ہے ، انہیں جانے دو، پارٹی اعلیٰ کمان سے مل کر اپنی بات رکھنے کا ، انہیں بھی حق ہے ۔