پٹنہ،21؍اکتوبر (ایس او نیوز؍آئی این ایس انڈیا)راجیہ سبھا کے صدر وینکیا نائیڈو نے جے ڈی یو کے سابق چیئرمین شرد یادو اور علی انور کو 30 اکتوبر کو بلایا ہے۔ ان دونوں رہنماؤں کو راجیہ سبھا کی رکنیت رد کرنے کے نوٹس پر اپنی رائے رکھنی ہے۔امید کی جا رہی ہے کہ شرد یادو اپنی رائے رکھنے کیلئے سابق مرکزی وزیر اور کانگریس کے ممبر پارلیامنٹ کپل سبل کیساتھ آئیں گے۔ حالانکہ اس کے پہلے راجیہ سبھا سیکریٹریٹ کے نوٹس پر شرد نے خود کواصلی جنتا دل یونائٹیڈ ہونیکا دعویٰ کیا تھا۔انہوں نے اس کے ساتھ میں 200 پیج کی دستاویزات بھی جمع کرائی ہیں ۔راجیہ سبھاسے سیکریٹریٹ کے اس نوٹس پر ممبر پارلیامنٹ علی انور کا کہنا ہے کہ پتہ نہیں نیتش کماراور ان کے حامیوں کو ہماری رکنیت رد کرانے کی اتنی جلدی کیوں ہے ؟ ویسے شاید انہیں بھی اس بات کا احساس ہے کہ راجد کے اسٹیج پر جانے کے بعد رکنیت بچنے کی کوئی زیادہ امید نہیں ہے ۔