اگلے لوک سبھا الیکشن میں سشما سوراج کا الیکشن نہ لڑنے کا اعلان
دہلی ۲۰ نومبر (ایس او نیوز) بھارتیہ جنتا پارٹی کی سینئر رہنما اور وزیر خارجہ سشما سوراج نے کہا ہے کہ وہ اگلا لوک سبھا الیکشن نہیں لڑیں گی۔ سشما سوراج نے اندور میں میڈیا کے ساتھ بات چیت کے دوران یہ اطلاع دی اور کہا کہ انہوں نے پارٹی کو اپنی منشا بتا دی ہے۔
سشما ا سوراج اس وقت مدھیہ پردیش میں ہیں۔ وہ اسمبلی الیکشن کے مدنظر بی جے پی کی انتخابی تشہیر میں مصروف ہیں۔ اسی ضمن میں وہ منگل کو اندور پہنچیں جہاں انہوں نے یہ بیان دیا ہے۔ معلومات کے مطابق، انہوں نے اپنے اس فیصلے سے پارٹی کے صدر امت شاہ کو آگاہ کر دیا ہے۔
سشما سوراج مدھیہ پردیش کے ودیشا سے رکن پارلیمنٹ ہیں۔ گزشتہ کچھ مہینوں سے یہ قیاس آرائی کی جا رہی تھی کہ صحت کی وجوہات سے شاید وہ اگلا لوک سبھا الیکشن نہ لڑسکیں گی۔ قیاس آرائی یہ بھی کی جا رہی ہے کہ بی جے پی اب انہیں راجیہ سبھا کے ذریعہ پارلیمنٹ میں بھیجے گی۔