پرتگال،18؍جون(ایس او نیوز؍آئی این ایس انڈیا)پرتگال کے جنگل میں لگنے والی آگ خطرناک صورتحال اختیار کر گئی ہے اور اس سے مرنے والوں کی تعداد 43ہو گئی جب کہ 50سے زائد افراد کے زخمی ہونے کی اطلاعات بھی ہیں۔حکام کا کہنا ہے کہ پیدروگاو گرانڈے کے علاقے میں لگنے والی اس آگ کو بجھانے کے لیے سیکڑوں کارکنان مصروف ہیں جب کہ اسپین کے امدادی کارکان بھی معاونت فراہم کر رہے ہیں۔وزیراعظم انتونیو کوسٹا کا کہنا تھا کہ بدقسمتی سے جنگلاتی آگ کے حوالے سے یہ بظاہر حالیہ برسوں میں سب سے بڑا سانحہ ہے۔" ان کے بقول ہلاکتوں میں اضافے کا خدشہ ہے۔داخلہ کے وزیر مملکت جارج گومز کا کہنا ہے کہ آگ کے شعلے بہت تیزی سے تباہی مچا رہے ہیں۔حکام کے مطابق زیادہ تر ہلاکتیں ان افراد کی ہوئیں جو اپنی گاڑیوں میں متاثرہ علاقے سے نقل مکانی کر رہے تھے کہ دھوئیں کے باعث دم گھٹنے کی وجہ سے موت کا شکار ہوئے۔

سولہ افراد اس وقت ہلاک ہوئے جب ان کی گاڑیاں آگ کی زد میں آئیں اور وہ ان میں سے باہر نکلنے میں کامیاب نہ ہو سکے۔پرتگال کو ہفتہ کو شدید گرم لہر کا سامنا کرنا پڑا اور یہاں درجہ حرارت 40درجے سینیٹی گریڈ سے بھی تجاوز کر گیا۔حکام کے بقول رات گئے ملک کے مختلف جنگلوں میں 60مقامات پر آگ بھڑی اٹھی جنہیں بجھانے کے لیے 1700کے لگ بھگ کارکنان حصہ لے رہے ہیں۔وزیر اعظم کوسٹا کا کہنا تھا کہ تیز گرم ہواوں کی وجہ سے آگ مزید تیزی سے پھیلی اور متعدد متاثرہ دیہاتوں سے لوگوں کی نقل مکانی میں معاونت فراہم کی جا رہی ہے۔