درج فہرست طبقات کو ترقی میں ریزرویشن کا قانون جلد: نائب وزیراعلیٰ پرمیشور
بنگلورو،24؍ستمبر(ایس او نیوز) نائب وزیراعلیٰ ڈاکٹر جی پرمیشور نے کہاہے کہ صدر جمہوریہ سے منظور شدہ درج فہرست طبقات کے پرموشن ریزرویشن قانون کو عنقریب لاگو کردیا جائے گا۔اپنی رہائش گاہ پر اخباری نمائندوں سے بات چیت کرتے ہوئے انہوں نے کہاکہ اس قانون کے تحت درج فہرست طبقات میں شامل جن ذاتوں اور قبائل کوشامل کیا گیا ہے، ان سے وابستہ تمام سرکاری ملازمین کو پرموشن میں ریزرویشن ملے گا۔انہوں نے کہاکہ اس قانون کو پچھلی سدرامیا حکومت نے منظور کرایا تھا۔ اس پر صدر جمہوریہ کے دستخط نہ ہونے کی وجہ سے اسے نافذ نہیں کیا گیا تھا۔صدر جمہوریہ کی طرف سے اس سلسلے میں چند تفصیلات طلب کی گئیں ، جنہیں ریاستی حکومت کی طرف سے مہیا کرائے جانے کے بعد صدر جمہوریہ نے اس پر دستخط کردئے ہیں۔ انہوں نے کہاکہ پرموشن میں ریزرویشن کا نفاذ نہ ہونے پر جس طرح وزیر سماجی بہبود پریانک کھرگے نے افسوس جتایا ہے اتناہی افسوس انہیں بھی ہے عنقریب ریاستی کابینہ میں اس پر تبادلۂ خیال کیا جائے گا اور اس پر اگلا قدم اٹھایا جائے گا۔ پرمیشور نے بتایاکہ صدر ہند کا دستخط شدہ مسودہ قانون ایک دو دنوں میں کرناٹک کو ملنے کی توقع ہے، یہ ملنے کے بعد اس کا جائزہ لیا جائے گااور فوری طور پر اسے نافذ کردیا جائے گا۔ شہر بھر میں جابجا سڑکوں پر گڈھوں کی شکایتوں کے متعلق نائب وزیراعلیٰ نے کہاکہ بیک وقت شہر کی تمام سڑکوں کی تمام گڈھے بند کرنا عملاً ناممکن ہے۔ہر بارش کے ساتھ گڈھوں کی تعداد بڑھتی رہتی ہے، ان تمام کی نشاندہی کرکے انہیں بند کیا جائے گا۔ عدالت کی طرف سے گڈھوں کوبند کرنے کے لئے جو حکم صادر کیاگیا ہے اس پر حتی الامکان عمل کیا جارہا ہے۔ انہوں نے کہاکہ سڑکوں کے گڈھوں کو گن گن کر بند کرنا ممکن نہیں ہے۔ ایک بار گننے کے بعد تازہ بارش سے گڈھوں کی تعداد اور بڑھ جاتی ہے۔ ان کا کیا کیا جائے۔ سڑکوں کے استعمال کے ساتھ بھی گڈھوں کی تعداد بڑھتی ہے، ان تمام کو ذہن میں رکھ ہی مرمت کا کام کیاجاتا ہے۔ وزیراعلیٰ ایچ ڈی کمار سوامی پر کانگریس اراکین اسمبلی کے ساتھ امتیازی رویہ اپنانے کے متعلق بعض کانگریس اراکین کی شکایت پر نائب وزیراعلیٰ نے کہاکہ کمار سوامی کی طرف سے ایسا کوئی امتیاز دیکھنے میں نہیں آیا ہے۔ اگر ایسا کچھ ہے تو وہ کمار سوامی سے خود بات کریں گے۔ ریاستی حکومت کو گرانے کے لئے بی جے پی کی طرف سے کی جارہی تمام کوششوں کو فضول قرار دیتے ہوئے انہوں نے کہاکہ بی جے پی کو ریاست کے اقتدار پرقبضہ کرنے کی حوس ہوگئی ہے، اسی لئے کسی نہ کسی طرح حکومت کوگرانے کی کوشش میں لگی ہے۔ بی جے پی اپنی کوششیں کرتی رہے اور اسے ناکام بنانے کی کوشش ہم بھی کرتے رہیں گے۔ پرمیشور نے کہاکہ ریاست میں کانگریس جے ڈی ایس مخلوط حکومت اپنے پانچ سال مکمل کرے گی ۔کانگریس پارٹی میں کسی بھی طرح کے اختلافات کو قیاس قرار دیتے ہوئے کہاکہ پارٹی میں سبھی متحد ہیں۔ انہوں نے کہاکہ وزارت نہ ملنے پر رکن اسمبلی ایم ٹی بی ناگراج اور ڈاکٹر سدھاکر ناراضی سے وہ واقف ہیں۔ لیکن ان کو منانے کی بھی کوشش کی جارہی ہے۔انہوں نے کہا کہ یہ دواراکین اسمبلی اس لئے بھی ناراض ہیں کہ ان کے اسمبلی حلقوں میں ترقیاتی کام وقت مقررہ پر شروع نہیں کئے گئے ہیں۔ ان سے بات چیت کرکے جلد ان کاموں کی شروعات یقینی بنائی جائے گی۔