تالابوں اور نالوں پر غیر قانونی قبضے ہٹانے کے لئے مہم جلد: ڈپٹی کمشنر وجئے شنکر
بنگلورو،16؍اکتوبر(ایس او نیوز) بنگلور ضلع کے ڈپٹی کمشنر وجئے شنکر نے کہا ہے کہ شہر میں تالابوں اور بڑے نالوں پر غیر قانونی قبضے ہٹانے کے لئے مہم عنقریب شروع کردی جائے گی۔ آج اس سلسلے میں اعلیٰ افسروں کے ساتھ میٹنگ کے بعد اخباری نمائندوں سے بات چیت کرتے ہوئے انہوں نے کہاکہ جن بڑے نالوں پر غیر قانونی قبضے ہوچکے ہیں وہاں پر مارکنگ کاکام پورا کرلیا گیا ہے۔ مقامی لوگوں کو جو غیر قانونی طور پر نالوں کے بفر زونس پر قبضہ کئے ہوئے ہیں نوٹس جاری کردئے گئے ہیں۔
انہوں نے کہاکہ اس بار بنگلور ضلع انتظامیہ کی طرف سے انہدامی مہم منظم طریقے سے چلائی جائے گی اور غیر قانونی قبضوں کی نشاندہی کرکے سروے کرنے والے افسروں کی موجودگی میں ان عمارتوں کا انہدام کیا جائے گا جو غیر قانونی قبضوں کے سروے کا حصہ ہیں۔ انہوں نے کہاکہ تالابوں کے متعلق کئے گئے سروے کے ذریعے انتظامیہ کے سامنے یہ بات آئی ہے کہ شہر کے دس تالابوں میں گندی نالیوں کا پانی بہایا جارہاہے۔ اس کے علاوہ صنعتوں اور دیگر مقامات سے بہایا جانے والا فضلہ بھی کئی تالابوں میں جمع ہورہاہے، محکمۂ ماحولیات اور دیگر ایجنسیوں سے اشتراک کے ذریعے اس کے خلاف بھی کارروائی شروع کی جائے گی۔
انہوں نے کہاکہ آلودگی کنٹرول بورڈ، محکمۂ چھوٹی آب پاشی، بی بی ایم پی ، بی ڈبلیو ایس ایس بی اور دیگر محکموں کے اعلیٰ افسروں کے ساتھ اب تک تالابوں پر غیرقانونی قبضے ہٹانے اور یہاں کے پانی کو صاف کرنے کے سلسلے میں دو میٹنگیں کی گئی ہیں۔ ان میٹنگوں کے دوران طے کیا گیا ہے کہ ابتدائی طور پر دس آلودہ تالابوں کی صفائی کاکام بڑے پیمانے پر شروع کیا جائے اور صفائی کے بعد ان تالابوں کی مکمل نگرانی کا ذمہ بی ڈی اے کے سپرد کردیا جائے ، ان تالابوں کی نگرانی پر جو بھی خرچ آئے گا اسے برداشت کرنے کے لئے بی ڈی اے بی ڈبلیو ایس ایس بی، بی بی ایم پی اور دیگر اداروں کے اشتراک سے کام کیا جائے گا۔ انہوں نے کہاکہ تالابوں کی صفائی کے فنڈز کے استعمال اور اس کی نگرانی کے لئے تمام ایجنسیوں پر مشتمل اعلیٰ افسروں کی ایک کمیٹی تشکیل دی گئی ہے۔