بنگلورو،6؍اکتوبر(ایس او نیوز) انسداد کرپشن بیورو نے رشوت خور افسروں کو بے نقاب کرنے کی اپنی مہم جاری رکھتے ہوئے آج بلگاوی اور باگلکوٹ میں دو اور افسروں کے ٹھکانوں پر چھاپے مارے اور ان کے پاس سے بھی نقد رقم بیش قیمتی اشیاء وغیر برآمد کیں۔

بلگاوی ضلع کے خانہ پور سب ڈویژنل فارسٹ افسر چندرے گوڈا پاٹل، اور باگلکوٹ میں دیہی آب رسانی شعبے کے اسسٹنٹ ایگزی کیٹیو انجینئر چدانند بی منچی نال کے ٹھکانوں پر آج صبح اے سی بی افسروں نے چھاپے مارے اور ان کے پاس سے نقد رقم ، چاندی اور سونے کے زیورات ، برتن اور اثاثوں کے بے شمار دستاویزات برآمد کئے۔ ان دونوں افسروں کے چھ ٹھکانوں پر چھاپے مارے گئے۔ چندرے گوڈا پاٹل کے خانہ پور اور بلگاوی کے رام تیرتھا نگر کے دفاتر ، بیلہونگل میں اس کے مکان اور دیگر ٹھکانوں کو نشانہ بناکر کئی دستاویزات ضبط کئے گئے ۔

ضلع کے اے سی بی ایس پی امرناتھ ریڈی کی قیادت میں آج صبح یہ چھاپے مارے گئے۔ بتایاجاتاہے کہ چندرے گوڈا پاٹل کے گھر سے چھ لاکھ روپے نقد 600 گرام سونا،تین کلو چاندی ، اثاثوں کے متعدد دستاویزات وغیرہ شامل تھے۔ چندرے گوڈا پاٹل کے پاس سے کئی بینکوں کے پاس بک ، اے ٹی ایم کارڈ وغیرہ بھی برآمد کئے گئے۔ دوسرا چھاپہ باگلکوٹ ضلع میں دیہی آب رسانی کے اسسٹنٹ انجینئر چدانند کے گھر پر مارا گیا اور اس کے پاس سے بھی بھاری مقدار میں سونے اور چاندی کے زیورات ، نقد رقم اور اثاثوں کے دستاویزات وغیرہ برآمد کئے گئے۔ باگلکوٹ میں اے سی بی کے ڈی وائی ایس پی ملاپور کی نگرانی میں یہ چھاپہ مارا گیا۔