نئی دہلی،23/ستمبر(ایجنسی)کانگریس کا کہنا ہے کہ انڈرورلڈ ڈان داؤد ابراہیم کی بیوی کا چپ چاپ ہندوستان آنا اور پاکستان لوٹنا ملک کی سلامتی کا سنگین معاملہ ہے اس لئے وزیر اعظم نریندر مودی اور وزیر داخلہ راج ناتھ سنگھ کو اس پر جواب دینا چاہئے۔

کانگریس میڈیا سیل کے سربراہ رندیپ سرجے والا نے ایک بیان میں کہا کہ داؤد ابراہیم کی بیوی مہ جبین شیخ گذشتہ سال ممبئی آئی اور پندرہ دن یہاں رہنے کے بعد پاکستان لوٹ گئی ۔ حکومت اور اس کی سیکورٹی ایجنسیوں کو بھنک تک نہیں لگی کہ ایک خطرناک دہشت گرد کی بیوی ممبئی آئی اور یہاں پندرہ دنوں تک رکنے کے بعد پاکستان لوٹ گئی۔

سرجے والا اسے قومی سلامتی کی سطح پر حکومت کی ناکامی قرار دیتے ہیں، اور کہا کہ ان حالات  میں  داؤد  ابراہیم کی بیوی ہندوستان آئی اور آسانی سے پاکستان لوٹ گئی ۔ اسے گرفتار کرنا تو دور کی بات اس کے آنے جانے کی کسی کو خبر تک نہیں ہوسکی۔ترجمان نے کہا کہ مودی اور راجناتھ سنگھ کو اس سلسلے میں ملک کی عوام کو جواب دینا چاہئے ۔ وزیر اعظم کو اس سلسلے میں جواب دہی طے کرکے یہ بتانا چاہئے کہ اس کے لئے ذمہ دار لوگوں کے خلاف کس طرح کی کارروائی کی گئی۔

اس سے پہلے کانگریس کے ترجمان راجیو شکلا نے یہاں نامہ نگاروں کو بتایا کہ میڈیا میں خبر ہے کہ داؤد کی بیوی مہ جبیں شیخ گذشتہ سال ہندوستان آئی تھیں، اورممبئی میں پندرہ دن تک رہنے کے بعد خاموشی سے لوٹ گئی تھی۔وہ اپنے والد سے ملاقات کے سلسلےمیں ہندوستان  آئی تھیں۔ انہوں نے کہا کہ اگر خبر درست ہے تو یہ معاملہ نہایت سنگین ہے اور حکومت کو بتانا چاہئے کہ اس کی خفیہ ایجنسیاں کیا کررہی تھیں۔
 انہوں نے کہا کہ پورا ملک دہشت گردی کی جنگ لڑ رہا ہے اور ایک دہشت گرد کی بیوی ملک میں آکر دو ہفتے تک رہتی ہے اور اس کے باوجود کسی کو اس بات کی بھنک تک لگے بغیر لوٹ جاتی ہے تو یہ دہشت گردی کے خلاف ہماری لڑائی پر بھی سوال  اٹھاتا ہے اس لئے حکومت کو اس سلسلے میں جواب دینا چاہئے۔