ممبئی میں قانونی امداد کمیٹی جمعیۃ علماء مہاراشٹرکے سکریٹری گلزار اعظمی کی بڑی صاحبزادی انتقال کرگئی
ممبئی 20/اپریل (ایس او نیوز/مولانا محمد عارف عمری) قانونی امداد کمیٹی جمعیۃ علماء مہاراشٹر کے سکریٹری محترم گلزار اعظمی کی ’’بڑی صاحبزادی‘‘ کا بدھ اور جمعرات کی درمیانی شب تقریباً ڈھائی بجے طویل علالت کے بعددوران علاج ممبئی کے نائر اسپتال میں انتقال ہوگیا۔انا للہ و انا الیہ راجعون۔ مرحومہ صوم و صلٰوۃ کی پابند ،نیک سیرت خاتون تھیں۔
نماز جنازہ جمعرات دوپہر ۱۲؍ بجے ادا کی گئی اور ہزاروں سوگواروں کی موجودگی میں بھیونڈی کے قبرستان میں تدفین عمل میں آئی ۔پسماندگان میں ۲؍ لڑکا ، ایک لڑکی اور پوتے پوتیاں ہیں۔
جمعیۃ علماء مہاراشٹر کے صدرمولانا مستقیم احسن اعظمی و جنرل سکریٹری مولانا حلیم اللہ قاسمی نے مرحومہ کے انتقال پر اپنے گہرے رنج و غم کا اظہار فرمایا اورگلزار احمد اعظمی صاحب سے تعزیت مسنونہ پیش کی ،ساتھ ہی بارگاہ ایزدی میں دعا فر مائی کہ اللہ تبارک و تعالیٰ پسماندگان کو صبر جمیل عطا فرمائے۔اور مرحومہ کو جنت الفردوس میں اعلیٰ مقام عطا فرمائے۔آمین
ادارہ ساحل آن لائن بھی محترم گلزار اعظمی صاحب کے غم میں برابرکے شریک ہیں، اللہ تعالیٰ اُنہیں اور جملہ پسماندگان کو صبر واستقامت عطا فرمائے اور مرحومہ کی بال بال مغفرت فرمائے۔ اٰمین