ڈانڈیلی ٹاؤن میونسپالٹی رکن نے خودکی برہنہ تصویریں گروپ پر پوسٹ کردی۔کانگریس نے کیا رکنیت سے معطل
ڈانڈیلی 20مارچ (ایس او نیوز)ڈانڈیلی نگر سبھا کے سابق نائب صدر اور موجودرکن راجو رودراپاٹی خود اپنی ہی ننگی تصویریں کانگریس پارٹی کے وہاٹس ایپ گروپ میں پوسٹ کرکے ذلیل و خوار ہونے کا معاملہ سامنے آیا ہے۔
موصولہ رپورٹ کے مطابق کانگریس پارٹی کے لیڈر راجو رودراپاٹی نے باتھ روم میں اپنے ہی فون سے اپنی شرم گاہ کی سیلفی تصویریں اتاری تھیں جو وہاٹس ایپ گروپ پر عام ہوگئیں۔ یہ پتہ نہیں چل سکا ہے کہ راجو نے یہ حرکت جان بوجھ کر کی تھی یا پھر غلطی سے یہ تصویریں اَپ لوڈ ہوگئیں۔ لیکن گروپ پر تصویریں پوسٹ ہوتے ہی سب ہکا بکا رہ گئے۔ بتایا گیا ہے کہ اس گروپ میں کانگریسی لیڈران، رکن اسمبلی اور خواتین ممبران کی تعداد200سے زائد ہے۔ زیادہ تر اراکین شرمسار ہوگئے تو کچھ اراکین نے اسے دوسرے گروپس میں فارورڈ کرکے بہت سارے لوگوں کو تفریح کا سامان مہیا کروادیا۔جس سے ہر طرف اس ذلیل حرکت کا چرچا ہونے لگااور ڈانڈیلی بلدیہ رکن کی عزت خاک میں مل گئی۔
اس بات کی خبر ملتے ہی یووا کانگریس کے لیڈران نے گروپ سے تمام اراکین کے نام ڈیلیٹ کرتے ہوئے فوری طور پر گروپ کو ہی بند کردیا۔مگر تب تک یہ برہنہ تصاویر سوشیل اور الیکٹرانک میڈیا پر وائرل ہوچکی تھیں۔کانگریس پارٹی کے طرف سے اس واقعے پر ندامت اور افسوس کا اظہار کرتے ہوئے راجو کوضلع کانگریس کی رکنیت سے معطل کیے جانے اور ضلع صدر بھیمنّا نائک کی طرف سے وجہ بتاؤ نوٹس جاری کیے جانے کی اطلاع بھی ملی ہے۔
راجو کے گھر والوں کا کہنا ہے کہ پچھلے کچھ دنوں سے راجو رودراپاٹی نفسیاتی مرض کا شکار ہوگیا ہے۔ کبھی کبھار وہ ایسے کام کرجاتا ہے کہ اس بارے میں خود اسے کچھ پتہ نہیں ہوتا۔ فی الحال نفسیاتی ا مراض کے ماہر ڈاکٹر سے اس کا علاج کیا جارہا ہے۔ گھر میں جب کوئی بھی موجود نہیں تھا تو اس نے اس طرح کی تصاویر سیلفی لے کر گروپ میں پوسٹ کرنے کی حرکت کی ہے جو خود اہل خانہ کے لئے شرمندگی کا باعث بن گئی ہے۔