اننت کمار ہیگڈے کے خلاف ہبلی میں دلت تنظیموں کا احتجاج۔ کتے کی شکل میں جلایاگیا وزیر کا پتلا
ہبلی 24؍جنوری (ایس او نیوز)مرکزی اسکل ڈیولپمنٹ وزیر اننت کمار ہیگڈے نے اپنے خلاف احتجاج کرنے والے دلتوں کو کتوں سے تشبیہ دے کر جو تنازعہ کھڑا کیا ہے اسی پس منظر میں ہبلی دھارواڑ کی مختلف دلت تنظیموں کے وفاق کی جانب سے زبردست احتجاجی مظاہرہ کیا گیا۔
احتجاجی مظاہرین نے وزیر اننت کمار ہیگڈے کی تصویرکو کتے کی شکل میں بدل کرپتلا بنایا تھااور اس کے گلے میں چپلوں کاہار پہناکراننت کمار کے خلاف مذمتی نعرے بازی کی۔پھر اس کے بعد اپنا غصہ ظاہر کرنے کے لئے وزیر موصوف کے پتلے کو نذر آتش کردیا۔
مظاہرین کا الزام تھا کہ دستور ہند اور دلتوں کے خلاف اشتعال انگیز بیان بازی کے لئے آر ایس ایس اور وزیراعظم نریندر مودی نے اننت کمار کو آگے چھوڑ رکھا ہے۔احتجاجیوں نے مطالبہ کیا کہ مرکزی حکومت اننت کمار کو وزارت سے فوراً بے دخل کردے۔ اور ریاستی حکومت دلتوں کی تحقیر و تذلیل کرنے والے اننت کمار کو تڑی پار کردے۔مظاہرین نے تنبیہ کرتے ہوئے کہا کہ اگر اننت کمار کے خلاف اقدام نہیں کیا گیا تو پھردلت تنظیموں کی طرف سے ہر مقام پر آر ایس ایس کے دفتروں کے باہر احتجاجی مظاہروں کا سلسلہ شروع کیا جائے گا۔