ہلیال میں ڈکیتی کی خطرناک واردات؛ شوہر، بیوی اور بچوں کو یرغمال بناکر گھر کے زیورات لوٹ کرلُٹیرے فرار
بھٹکل 12 جون (ایس او نیوز) ضلع اُترکنڑا کے ہلیال تعلقہ میں آج صبح ڈکیتی کی خطرناک واردات پیش آئی ہے جس میں لُٹیروں نے گھر پر موجود شوہرپر حملہ کرتے ہوئے اور بیوی بچوں کو یرغمال بناتے ہوئے گھر پر موجود سونے کے زیورات حاصل کرنے کے بعد گھر کی بائک پر ہی سوار ہو کر فرار ہوگئے ہیں۔ ڈکیتی کی یہ وارادت آج منگل صبح پیش آئی ہے۔
اطلاع کے مطابق صبح قریب چار بجے ہلیال بس اسٹائند کے عقب میں واقع کے ایچ بی کالونی میں مقیم ایم کے شاستری کے مکان کا دروازہ توڑ کر چار لُٹیرے گھر کے اندر گھس گئے، پھر شاستری پر حملہ کرکے اُنہیں جان سے مارنے کی دھمکی دیتے ہوئے بیوی اور بچوں کو یرغمال بنایا اور گھر پر موجود تمام سونے اور زیورات دینے کا مطالبہ کیا۔ پھر گھر کی الماریوں کی تلاشی لیتے ہوئے سبھی زیورات اور قیمتی چیزیں حاصل کی، بتایا گیا ہے کہ لُٹیروں کو دیکھ کراور اُن کے ارادوں کو بھانپ کر خوف زدہ شوہر اور بیوی نے اپنی اور اپنے بچوں کی جان کی بھیک مانگی ، جس پر لُٹیروں نے اُنہیں زندہ چھوڑ دیا اور گھر کے باہر رکھی ہوئی شاستری کی بائک کو بھی اپنے ساتھ لے کر فرار ہوگئے۔
شاستری نے پولس کو بتایا کہ جملہ 18 تولہ سونے کے زیورات سمیت کافی نقد رقم اور بائک لے کر لُٹیرے فرار ہوگئے ہیں۔ ہلیال پولس موقع پر پہنچ کر جائز ہ لینے کے بعد معاملہ درج کرلیا ہے۔ چھان بین جاری ہے۔